ABŞ-də səkidə yıxılan qadına 7,5 milyon dollar təzminat ödənilib.
Redaktor.az xarici KİV-ə istinadən xəbər verir ki, yıxıldığına görə ağır xəsarətlər alan Justine Gurrola Whittier şəhərini məhkəməyə verib.
O, ağac köklərinin səbəb olduğu qeyri-bərabər bir səthə yıxıldığını iddia edib. Məhkəmə sənədlərinə görə, o, bilək, dirsək və burnundan, o cümlədən diz, boyun və kürək nahiyəsindən xəsarət alıb. Həkimlər ona yüngül beyin travması və bu günə qədər də davam edən xroniki ağrı diaqnozu qoyublar.
Məhkəmə bir neçə həftə davam edib. Bundan sonra münsiflər heyəti yekdilliklə Whittier şəhərini hadisəyə görə tam məsuliyyətə cəlb edib. Qadının vəkili qeyd edib ki, şəhər rəsmiləri illərdir sakinlərin zədələnmiş səkilərlə bağlı şikayətlərinə məhəl qoymayıb, effektiv yoxlama və təmir protokollarını həyata keçirməyib.
Bunun fonunda məhkəməni qazanan müəllim 7,5 milyon dollar təzminat alıb.
