ABŞ ordusu Karib dənizindəki əməliyyatlardan məsul olan ABŞ Cənub Komandanlığı ərazisinə "USS Gerald R. Ford" təyyarədaşıyan gəmisinin rəhbərlik etdiyi bir təyyarədaşıyan zərbə qrupu göndərəcək.
AFN.az xarici mediaya istinadən xəbər verir ki, bu barədə ABŞ müdafiə nazirinin ictimaiyyətlə əlaqələr üzrə köməkçisi Şon Parnell açıqlama verib. Qeyd olunur ki, bu qüvvələr bölgədə narkotik qaçaqmalçılığı ilə mübarizə aparmaq üçün yerləşdiriləcək.
Açıqlamada deyilir: "Prezidentin transmilli cinayətkar təşkilatları ləğv etmək və vətəni müdafiə etmək üçün narkoterrorizmlə mübarizə aparmaq barədə göstərişini dəstəkləmək məqsədilə Müdafiə Naziri Pit Heqset 'USS Gerald R. Ford' təyyarədaşıyan zərbə qrupu və onun hava qanadını ABŞ Cənub Komandanlığının məsuliyyət ərazisinə göndərib".
Sənəddə bildirilir ki, bu qüvvələrə narkotik qaçaqmalçılığının izlənməsi və qarşısının alınması, eləcə də ABŞ-ın təhlükəsizliyini təhdid edən fəaliyyətlərin qarşısının alınması tapşırılıb.
