Coca-Cola, qazlı içkilərə olan tələbin artması sayəsində üçüncü rübdə gözləntilərdən yüksək gəlir əldə edib. Şirkətin gəliri 5% artaraq 12,5 milyard dollara yüksəlib.
Marja xəbər verir ki, dünyanın ən böyük içki istehsalçısı olan Coca-Cola-nın üçüncü rüb üzrə gəliri 5% artımla 12,5 milyard dollar təşkil edib. Analitiklər isə şirkətin 12,39 milyard dollar gəlir əldə edəcəyini proqnozlaşdırırdılar.
Şirkətin bir səhminə düşən mənfəəti 0,82 dollar olub ki, bu da 0,78 dollarlıq proqnozu üstələyib.
Coca-Cola illik düzəliş edilmiş orqanik gəlir (əsas əməliyyatdan gəlir) proqnozunu 6% səviyyəsində saxlayıb. Bazar proqnozu isə 5,3% səviyyəsində idi.
Orqanik gəlir (organic revenue) bir şirkətin əsas əməliyyat fəaliyyətindən əldə etdiyi gəliri ifadə edir və xarici təsirlərdən, yəni satınalmalar, birləşmələr, valyuta dəyişiklikləri və ya digər qeyri-adi gəlir mənbələrindən təsirlənmədən hesablanır. Sadə dillə desək: Orqanik gəlir, şirkətin öz əsas işi ilə yaratdığı gəlirdir. Məsələn, Coca-Cola üçün bu, qazlı və şəkərsiz içkilərin satışından əldə olunan gəlirdir, amma başqa şirkətlərin alınması və ya bir dəfəlik gəlirlər daxil deyil.
