Saqainq bölgəsindəki hücum zamanı qadın və uşaqlar da həlak olub, onlarla insan yaralanıb...
Poliqon xəbər verir ki, Myanmanın hərbi hökuməti ölkənin mərkəzi hissəsində yerləşən Saqainq bölgəsində dini mərasim zamanı dinc sakinlərin bombalanması faktını təsdiqləyib. Associated Press agentliyinin məlumatına görə, motoparaplanlardan atılan bombalar nəticəsində azı 24 nəfər, o cümlədən uşaqlar həyatını itirib, 50-dən çox insan isə yaralanıb.
Hərbi məlumat idarəsinin yaydığı bəyanatda hadisəyə görə məsuliyyət müxalif “müqavimət qüvvələri”nin üzərinə qoyulub. Ordu bu qrupları dinc sakinlərdən “canlı sipər” kimi istifadə etməkdə və əhalini hərbi hökumətə qarşı etiraz aksiyasına məcbur etməkdə ittiham edib. “Təhlükəsizlik qüvvələri əməliyyatı antiterror tədbiri kimi həyata keçirib və mülki itkilərin minimum səviyyədə saxlanması məqsədi güdüb”, – deyə bəyanatda bildirilib.
Hücum zamanı təxminən 100 nəfər buddist orucunun sonuna həsr olunmuş mərasimdə — yağ lampaları ilə keçirilən dua mərasimində iştirak edirmiş. Şahidlərin sözlərinə görə, mərasim zamanı iştirakçılar siyasi məhbusların azad edilməsini tələb edib və dekabrda hərbçilər tərəfindən təyin olunan seçkilərə etiraz ediblər.
Saqainq bölgəsi 2021-ci ilin fevralında ordunun Aun San Su Çjinin hökumətini devirməsindən sonra Myanmadakı silahlı qarşıdurmaların əsas mərkəzinə çevrilib. Hökumətin sabiq başçısı Su Çji çevrilişdən sonra Böyük Britaniyada sığınacaq tapıb.
Beynəlxalq təşkilatlar hadisəni dərin narahatlıqla qarşılayıb və Myanma ordusunu mülki əhaliyə qarşı zorakılıqlara son qoymağa çağırıblar.
Poliqon.info
