Al Jazeera telekanalı yüksək vəzifəli mənbəyə istinadən xəbər yayıb ki, HƏMAS ABŞ prezidenti Donald Tramp tərəfindən təklif olunan Qəzza münaqişəsinin tənzimlənməsi planına dair rəsmi cavabını vasitəçilərə təqdim edib.
Musavat.com xəbər verir ki, bu məlumat təsdiqlənərsə, uzunmüddətli müharibədə dönüş nöqtəsi ola bilər. Çünki ilk dəfə HƏMAS açıq şəkildə kompromisə hazır olduğunu bildirib — bütün sağ girovların azad edilməsi və həlak olanların cəsədlərinin qaytarılması qarşılığında beynəlxalq zəmanətlərin verilməsini və “uyğun şəraitin yaradılmasını” istəyib.
HƏMAS-ın Telegram kanalında yayımlanan bəyanatda qeyd olunur ki, hərəkat bu məsələni müzakirə etmək üçün vasitəçilərlə dərhal danışıqlara başlamağa və Qəzza sektorunun idarəçiliyini müstəqil texnokratlardan ibarət orqana təhvil verməyə hazırdır. Bu addım, iki ilə yaxın davam edən dağıdıcı müharibədən sonra, təşkilatın mövqeyində ciddi dəyişiklik siqnalı kimi qiymətləndirilir.
Bununla yanaşı, HƏMAS bəyanatında vurğulayıb ki, Qəzzanın gələcəyi, fələstinlilərin hüquqları və statusu ilə bağlı qərarlar yalnız beynəlxalq hüquq və BMT qətnamələri çərçivəsində qəbul olunmalıdır. Bu da göstərir ki, təşkilat siyasi subyektivliyindən imtina etmək niyyətində deyil və gələcək proseslərdə iştirakını qorumağa çalışır.
Məlumatlara görə, Misir, Qətər və Türkiyə ABŞ planının qəbul etdirilməsi üçün fəal diplomatik səylər göstərir. Misirin xarici işlər naziri Badr Abdelatty bildirib ki, bu təşəbbüs müharibənin dayandırılması üçün yeganə real yol hesab olunur.
ABŞ-ın təşəbbüsünə Səudiyyə Ərəbistanı, BƏƏ, İordaniya, Türkiyə və Pakistan kimi mühüm ərəb dövlətləri də dəstək verib. Ekspertlər hesab edir ki, HƏMAS artıq siyasi təcrid riski ilə üz-üzə qalıb və bu səbəbdən dialoqa razılıq verməyə məcburdur.
Vaşinqton isə məsələni ehtiyatlı optimizmlə qarşılayır. Donald Tramp bəyan edib ki, “HƏMAS sülhə hazırdır” və İsraildən bombardmanları dərhal dayandırmağı tələb edib.
İsrail tərəfi yeni danışıqlar mərhələsini nəzərdən keçirməyə razı olsa da, HƏMAS-ın tam silahsızlaşdırılmasında israr edir.
Musavat.com
