Amerikalı hərbi analitik Maykl Klark bildirib ki, Ukrayna qış gəlməmişdən əvvəl işğal olunmuş Krıma sürpriz əks-hücum keçirə bilər. Klark bildirib ki, Kerç körpüsünə hava və ya dəniz hücumu cəbhə xəttindəki vəziyyəti dəyişdirmək və Qərbin təsəvvürlərinə təsir etmək üçün mümkün ssenarilər arasındadır.
Hafta.az-ın “Sky News”a danışan Maykl Klark Ukrayna hərbçilərinin Rusiyanın işğalı altında olan Krıma qəfil hücum hazırlaya biləcəyini bildirərək, mümkün ssenarilərə hava hücumu, dəniz enişi və ya yarımadanı Rusiya ilə birləşdirən qanunsuz tikilmiş Kerç körpüsünə hücumun ola biləcəyini qeyd edib.
“Ukraynalılar sürprizləri sevirlər. Onlar bilirlər ki, bu, təkcə cəbhə xəttindəki ruslara deyil, həm də Qərbin Ukraynadakı vəziyyəti qavrayışına təsir edir”, - deyib Klark.
Ekspertin fikrincə, Ukrayna Silahlı Qüvvələrinin Rusiyanın radar və hava hücumundan müdafiə obyektlərinə, o cümlədən Krımda son hücumları Rusiyanın hava hücumundan müdafiə sistemində “boşluq” yaratmaq məqsədi daşıya bilər. Bu boşluq Ukraynaya daha mühüm strateji hədəfləri vurmağa imkan verəcək.
Klark, Ukraynanın Rusiyanın hava hücumlarına görə sərt qışa hazırlaşdığını, lakin Qərbin artan hərbi dəstəyi ilə mövqeyini qoruya biləcəyini bildirib. Klark qeyd edib ki, Rusiyanın hazırda “döyüş meydanında strateji dəyişiklik olacağına dair real gözlənti yoxdur” və bütün yay boyu davam edən Rusiyanın hücum əməliyyatı “az qala tükənib”.
Klark bəyan edib ki, Ukrayna müharibənin gedişatını sürətləndirmək üçün daha uzun mənzilli silahlara ehtiyac duyur. Bu məqsədlə analitik təklif edib ki, ABŞ gələcəkdə Ukraynaya Rusiyanın dərinliklərindəki hədəfləri vura bilən “Tomaqavk” qanadlı raketləri ilə təmin etməyi düşünə bilər.
