“Avropa İnsan Hüquqları Məhkəməsi (AİHM) hazırda ölkəmizdə məhkəmə istintaqı aparılan 23 erməni separatçısını "əsir" kimi təqdim edib və rəsmi Bakıdan hesabat istəyib. Avropa İnsan Hüquqları Məhkəməsi ədalət və hüququ yox, Avropanın hegemon maraqlarını təmsil edir. Ədalətə də, beynəlxalq hüquqa da iki prizmadan baxır. Bunlardan biri Avropa imperializminin mənafeyi, ikincisi isə istismar etməyə çalışdığı ölkələrin hakimiyyətini təzyiq altında saxlamaqdır. Birinci dəfə deyil, AİHM-nin bu cür qərarları ilə tanış oluruq. Sonuncu qərar isə əslində Avropa İnsan Hüquqları Məhkəməsinin özü özünü ifşasına gətirib çıxardı”.
Bu sözləri Pravda.az-a açıqlamasında Milli Məclisin deputatı Hikmət Babaoğlu deyib.
"Nəticə etibarilə, bu, hüquqsuzluğun, ədalətsizliyin çox bariz nüməsinə çevrildi. Çünki 30 il Azərbaycan torpaqlarını işğal altında saxlayan, Azərbaycana qarşı soyqırımı, hərbi cinayətlər törədən canilərin mövqeyini müdafiə etməsi ilə AİHM hüququn və ədalətin üz qarasına çevrildi. Əslində biz bənzər qərarları gözləyirdik, çünki Avropa İnsan Hüquqları Məhkəməsi heç vaxt ədalətli olmayıb, insan hüquqlarını deyil, öz mənafeyini, təmsil etdiyi Avropanın mənafeyini müdafiə edib. AİHM-nin qərarının nə olacağı və nəyi ifadə edəcəyi bizim üçün o qədər də maraqlı deyil. Əsas məsələ budur ki, xalqımıza qarşı cinayətlər törədənlər, terrorçular, separatçılar bu gün Azərbaycanın ədalətli məhkəmələri qarşısında mühakimə olunurlar və haqlı cəzalarına çatdırılacaqlar!" - deputat bildirib.
Aytəkin Qardaşova
