İsrail və Suriya rəsmiləri təhlükəsizlik razılaşması danışıqlarında irəliləyiş əldə etməklə tarixi bir mərhələyə yaxınlaşır. Yüksək səviyyəli İsrail rəsmisi i24NEWS-ə Netanyahu ilə Suriya prezidenti Şaraanın gələn həftə Vaşinqtonda böyük ehtimalla görüşəcəklərini deyib. Gözlənilən görüşün bazar ertəsi ABŞ prezidenti Trampın himayəsi altında keçirilə biləcəyi bildirilir. Tramp özünün ikinci dövr xarici siyasət gündəminin bir hissəsi kimi Yaxın Şərqdə Amerika vasitəçiliyini ön plana çıxarmağı hədəfləyir.
i24NEWS-in Yaxın Şərq üzrə baş müxbiri Ariel Oseran hələ iyul ayında Suriya prezidentinə yaxın mənbəyə istinadən Netanyahu və Şaraanın Vaşinqton görüşünə hazırlaşdıqlarını bildirmişdi. Mənbənin sözlərinə görə, iki lider bu görüşdə illərlə davam edən düşmənçilik və inamsızlıqdan sonra regional tarazlığı yenidən formalaşdıra biləcək təhlükəsizlik sazişini yekunlaşdırmağı planlaşdırır.
Razılaşmanın təfərrüatları rəsmi olaraq açıqlanmasa da, danışıqlarla tanış olan rəsmilər bildirirlər ki, sazişdə sərhəd təhlükəsizliyi məsələləri, terrorla mübarizə koordinasiyası və Colan təpələri boyunca eskalasiyanın qarşısını almaq üçün mexanizmlər nəzərdə tutulur. İmzalansa, bu, onilliklər ərzində İsrail və Suriya arasında ilk rəsmi razılaşma olacaq.
Netanyahu üçün bu görüş həm diplomatik risk, həm də fürsət kimi dəyərləndirilir. İsrailin baş naziri təkid edib ki, Suriya ilə istənilən qarşılıqlı əlaqə İranın dəstəklədiyi qruplar tərəfindən törədilən təhdidləri aradan qaldırmalı və İsrailin şimal sərhədlərinin təhlükəsizliyini təmin etməlidir.
Şəraa isə beynəlxalq legitimliyi və müharibədən əziyyət çəkən ölkəsi üçün iqtisadi dəstəyi təmin etmək istəyir, ona görə də ABŞ-ın sazişə dəstəyi çox vacibdir.
İsrail və Suriya rəsmiləri nikbinliyə baxmayaraq, həssas detalların hələ də həll olunmadığını və bölgədəki qeyri-sabit vəziyyətin son anda danışıqlara mane ola biləcəyi barədə xəbərdarlıq edir. Buna baxmayaraq, yüksək rütbəli İsrail rəsmisi i24NEWS-ə deyib ki, “görüşün baş tutma şansı kifayət qədər yüksəkdir”.
TAHİR
