Estoniya Böyük Britaniyanın nüvə silahı daşıya bilən qırıcılarını qəbul etməyə hazırdır

London, 23 sentyabr, AZƏRTAC

Estoniya müdafiə naziri Hanno Pevkur ölkəsinin Böyük Britaniyaya məxsus nüvə silahı daşıya bilən F-35A tipli qırıcı təyyarələri qəbul etməyə hazır olduğunu bildirib.

AZƏRTAC “The Telegraph”a istinadla xəbər verir ki, nazir jurnalistlərin Estoniyanın gələcəkdə nüvə silahı daşıya bilən Britaniyanın F-35A qırıcılarını yerləşdirməyə hazır olub-olmayacağı sualına buna həmişə açıq olduqlarını bildirib. “Müttəfiqlər üçün qapımız daim açıqdır”,- deyə nazir vurğulayıb.

Xatırladaq ki, bu ilin əvvəlində Böyük Britaniyanın Baş naziri Kir Starmer ölkənin 12 ədəd altıncı nəsil F-35A qırıcısı alacağını açıqlamışdı. Təyyarələrin təhvili onilliyin sonuna qədər nəzərdə tutulur. Qeyd edək ki, F-35A qırıcılarını istehsal edən ABŞ həm də onların daşıya bildiyi B61 nüvə bombalarının tədarükünə nəzarət edir. Bu səbəbdən nüvə silahından istifadə ilə bağlı hər hansı əməliyyata Vaşinqtonun razılığı tələb olunacaq.