Bakı şəhəri, Səbayıl rayonu, Bayıl qəsəbəsi ərazisində yaşayan Kazımova Ülviyyə Nizami qızı redaksiyamıza müraciət edərək “Music Gallery” mağazalar şəbəkəsindən qaz sobası aldığını və bu səbəbdən də ciddi problem yaşadığını bildirib.
Vətəndaş iddia edib ki, avqustun 26-da mağazadan 950 manata “Tamboy” qaz sobası alıb. O, sobanın pulunu nağd qaydada ödədiyini və məhsulun yaşadığı mənzilə 7-8 gün sonra çatdırıldığını bildirib.
Onun sözlərinə görə, sobanı quraşdırdıqdan sonra məlum olub ki, qarşıdakı gözlərdən biri yanmır və soba istifadəyə yararsız, eləcə də təhlükəlidir.
Bundan sonra Kazımova Ülviyyə Eynulla adlı satıcıya zəng edərək, qaz sobasını dəyişdirilməsini və ya pulun geri qaytarılmasını tələb etdiyini vurğulayıb. Şikayətçinin iddiasına görə, servisdə malın xarab olduğu təsdiqlənib.
O qeyd edib ki, soba “Electrolux” brendinə aid olub və şirkət Azərbaycanda artıq 5-6 ildir fəaliyyət göstərmir, alınan məhsul isə anbarda qalan xarab mal olub. Satıcı ona mağazaya gəlib 40 manat ödəməyi söyləyib. Əks halda pulun qaytarılmayacağını və məhsulun geri götürülməyəcəyini bildirib.
Kazımova Ülviyyə isə məcburiyyət qarşısında 40 manatı ödəyib və xarab sobanı geri qaytarıb. Kazımova Ülviyyə istehlakçı hüquqlarının müdafiəsini, haqsız olaraq ödədiyi 40 manatın geri qaytarılmasını tələb edir.
Məsələ ilə bağlı “Cebheinfo.az” saytının əməkdaşı “Music Gallery” mağazalar şəbəkəsi ilə əlaqə saxlayıb.
Şirkətin satış məsləhətçisi Eynulla Məmmədov bildirib ki, müştəriyə bütün məlumatlar əvvəlcədən izah olunub:
“Xanımın özünə ətraflı məlumat verilib. 40 AZN-lik tutulma məhz şirkətin daxili qaydası ilə əlaqədardır. Əgər şirkət məişət texnikasını müştərinin evindən özü götürürsə, əlavə 40 AZN tutulur. Bu barədə də xanıma əvvəlcədən məlumat verilib və bildirilib ki, əgər məhsulu özü mağazaya gətirə bilirsə, onda 40 AZN tutulmayacaq. Yəni müştəri məhsulu mağazaya gətirir və şirkət onu götürüb pulu geri qaytarır. Amma şirkət onu gəlib özü götürürsə, o zaman 40 manat ödəniş edir. Bu, şirkətin daxili qaydasıdır”.
O qeyd edib ki, məhsulda heç bir “deffekt” (qüsur) yoxdur:
“Bizim ustalar müştərinin evinə gedərək məhsulu yoxlayıblar. Ustalar həm xanıma, həm də bizə məlumat verdilər ki, məhsulda heç bir qüsur yoxdur. Problemin səbəbi Bayıl qəsəbəsinə verilən qazdadır. Müştərinin evinə gedən əməkdaş 15 ildir bu işlə məşğuldur. Əməkdaşımız bildirir ki, problem Bayıl qəsəbəsinə verilən qazdadır. Qaz sobasını göz isə işləyir, sadəcə arxadakı böyük gözlər qazın azlığı səbəbindən problem yaradır. Məhsul həm müştərinin evində, həm də servisdə dəqiq yoxlanıldı, hər hansı bir qüsur aşkarlanmadı. Həmin məhsuldan həmin gün iki ədəd satmışdım və yalnız bu məhsulda problem yarandı”.
Satış məsləhətçisi vurğulayıb ki, bu qaydalar yalnız şirkətin daxili prosedurlarına əsaslanır:
“Xanıma dedim ki, əgər məhsulu mağazaya özün gətirə bilirsənsə, gətir, bilmirsənsə, o zaman şirkət 40 AZN əlavə tutu edəcək. Buradan bir problem varsa, bu mağaza ilə bağı deyil. Hazırda “Music Gallery” mağazalar şəbəkəsinin vətəndaşlar tərəfindən daxil olan şikayətlərə baxılması üçün *1313 nömrəli "qaynar xətt" xidməti fəaliyyət göstərir. Xanım məhz bununla bağlı şirkətin “qaynar xətt”inə şikayətini bildirə bilər. Əgər xanımın şikayətini nəzərə alıb nəsə edə bilirlərsə, etsinlər.
Bir daha bildirərəm ki, əgər məhsulda həqiqətən qüsur olsaydı, şirkət onu tamamilə ödənişsiz şəkildə götürüb yenisi ilə əvəz edəcəkdi. Lakin burada problem müştəridən qaynaqlanır. Ona görə şirkət ona əlavə (40 AZN) tutulma ilə gedib məişət texnikasını götürür. Bütün bu məlumatlar hamısı xanıma izah olunub. Məhsulun qiyməti 950 AZN-dır və xanım məhsulun məbləğini tam geri alıb”.
