Serbiyada dünya iqtisadiyyatı üçün strateji əhəmiyyət daşıyan mis və qızılın iri yataqları aşkarlanıb.
Ölkə.az xəbər verir ki, bu kəşf müasir həyatın əsas dayaqları olan elektrik şəbəkələri, maliyyə sektoru və yüksək texnologiyalar üçün böyük əhəmiyyət kəsb edir.
"Earth" nəşrinin məlumatına görə, Timok bölgəsində yerləşən Malka Qola yatağında aparılan ilkin geoloji kəşfiyyat başa çatıb. “Zijin Mining Group” şirkətinin 2024-cü il hesabatında bildirilir ki, burada 2,81 milyon ton mis (orta tərkibi 1,87%) və 92 ton qızıl (orta tərkibi 0,61 qram/ton) resursu müəyyən edilib.
Misin 1,87 faizlik göstəricisi iri yataqlar üçün yüksək hesab olunur, xüsusilə də yatağın hüdudları mövcud qazma sahəsindən kənara çıxarsa. Qızılın orta miqdarı nisbətən aşağı olsa da, misi müşayiət etdiyi üçün əlavə iqtisadi dəyər yaradır.
Qeyd etmək lazımdır ki, bu göstəricilər resurslara aiddir, yəni yalnız geoloji qiymətləndirməni əks etdirir. Yatağın faktiki ehtiyatları və iqtisadi cəhətdən səmərəli hasilatı barədə yalnız mühəndis araşdırmaları və iqtisadi əsaslandırmadan sonra danışmaq mümkün olacaq.
Misə olan tələbat elektrik şəbəkələrinin modernləşdirilməsi, elektromobillərin istehsalı, data mərkəzlərinin qurulması və tikinti sektoru ilə sıx bağlıdır. Bu səbəbdən yeni yatağın aşkar edilməsi dünya bazarında strateji təsir göstərə bilər.
Bununla belə, hasilata başlamaq üçün illərlə davam edəcək əlavə qazma, araşdırma, icazələrin alınması və infrastrukturun qurulması tələb olunur.(valyuta.az)
