Misir öz ərazisində HƏMAS liderlərinin öldürülməsinə cəhdlər aşkar edib.
Moderator.az xəbər verir ki, bu barədə Misir rəsmiləri “Middle East Eye”a danışıb.
Bildirilib ki, İsrail Qahirədə HƏMAS liderlərini hədəf alacağı təqdirdə, Misir tam güclə bu addıma cavab verəcək.
“Kəşfiyyat hesabatları göstərir ki, İsrail bir müddətdir Qahirədə HƏMAS liderlərini öldürməyə cəhd göstərir. Misir torpağında HƏMAS liderlərinin həyatına qarşı hər hansı bir sui-qəsd təşəbbüsü suverenliyin pozulması kimi və İsrail tərəfindən müharibə elanı kimi qiymətləndiriləcək. Biz buna cavab verməkdən çəkinməyəcəyik”, - anonim Misir rəsmisi qeyd edib.
Misir rəsmisi əlavə edib ki, hazırda Sinay yarımadasında Çin havadan müdafiə sistemi quraşdırılır. Burada məqsəd hər hansı bir uçuş aparatının icazəsiz və aşkarlanmadan hava sahəsini keçməsini qeyri-mümkün etməkdir.
Xatırladaq ki, bir neçə gün əvvəl İsrail Qətərin paytaxtı Dohada HƏMAS rəsmilərinin olduğu obyektə zərbə endirib.
