Argentina prezidenti Xavyer Mileynin bu il mayın 14-də imzaladığı yeni qanun ölkədə doğulan uşağın valideynlərinə avtomatik vətəndaşlıq verilməsi ilə bağlı köhnə təcrübəni ləğv edib. Valideynlərin vətəndaşlıq üçün müraciət etməzdən əvvəl iki il qanuni yaşayışı olmalıdır.
Hafta.az-ın “Forbes”ə istinadən yazdığına görə, dəyişiklik Argentinada uşaq dünyaya gətirən və bu yolla vətəndaşlıq alan minlərlə Rusiya vətəndaşının yaratdığı immiqrasiya təzyiqindən qaynaqlanır. Rəsmi məlumatlara görə, təkcə 2022-ci ildə bu məqsədlə 10500 hamilə rusiyalı qadın ölkəyə daxil olub.
Yeni tənzimləmə ilə turist vizası ilə doğulan uşaqlar Argentina vətəndaşı olmağa davam edəcək, lakin valideynlər artıq avtomatik olaraq bu hüquqdan yararlana bilməyəcəklər. Eyni fərman həm də immiqrantlar üçün pulsuz tibbi xidmətə son qoyur, ölkəyə daxil olan hər kəsin icbari tibbi sığortaya malik olmasını tələb edir.
Qanundan sonra Argentinadakı rus icmasında qeyri-müəyyənlik hökm sürür. Doğuşdan dərhal sonra vətəndaşlıq üçün müraciət etməyi planlaşdıran müvəqqəti sənədlərlə yaşayan ailələrin planları pozulub. Yerli sahibkar Nikita Kruzement artıq qanuni yaşayış icazəsi olmadan heç kimin ölkədə iki il qalıb vətəndaşlıq üçün müraciət etməsinin mümkün olmadığını və bir çoxlarının planlarını yenidən nəzərdən keçirmək məcburiyyətində qalacağını bildirib.
Ölkədə immiqrasiya qaydaları sərtləşdirilərkən, Miley administrasiyası da iqtisadiyyatı stimullaşdırmaq üçün əhəmiyyətli islahatlar həyata keçirir. Kapital amnistiyaları, valyuta məhdudiyyətlərinin aradan qaldırılması, əmək qanunvericiliyində çeviklik həm yerli, həm də xarici investorlar üçün yeni imkanlar yaradır. Mebel sektoru üzrə sahibkar Anastasiya Poqojeva biznesin asanlaşdığını, xarici investisiyaların artdığını, “Decathlon” və “Louis Vuitton” kimi brendlərin ölkəyə qayıtdığını qeyd edib. Bununla belə, yüksək inflyasiya və mürəkkəb gömrük rüsumları kimi problemlər qalmaqdadır.
