Venesuela Amerika Birləşmiş Ştatlarının Karib dənizində dəniz və hava qüvvələri yerləşdirməsini Birləşmiş Millətlər Təşkilatına (BMT) şikayət edərək bunun regional sülh və sabitlik üçün ciddi təhdid yaratdığını bildirib.
"Cebheinfo.az" xəbər verir ki, Venesuelanın BMT-dəki Daimi Nümayəndəliyi vasitəsilə BMT Baş katibi Antonio Quterreşə təqdim edilən və Prezident Nikolas Maduronun imzasını daşıyan rəsmi məktubda, ABŞ-nin Karib dənizinə hərbi gəmilər və sürətli hücum qabiliyyətinə malik nüvə sualtı qayığı yerləşdirməsinin “misilsiz bir təhdid səviyyəsi” yaratdığı vurğulanıb.
Karakas hökuməti bölgəyə ilk dəfə nüvə imkanlarına malik hərbi vasitələrin yerləşdirildiyini bildirərək, bunun Latın Amerikası və Karib dənizinin nüvə silahlarından azad edilməsini nəzərdə tutan Tlatelolko Müqaviləsini pozduğunu, ABŞ-nin da həmin müqavilənin protokollarına tərəf olduğunu qeyd edib.
Venesuela həmçinin bu addımın BMT Nizamnaməsinin suveren bərabərlik, münaqişələrin sülh yolu ilə həlli, güc tətbiqinin qadağan olunması və daxili işlərə qarışmamaq prinsipləri ilə ziddiyyət təşkil etdiyini vurğulayıb. Bəyanatda 2014-cü ildə Latın Amerikası və Karib Dövlətləri Birliyi (CELAC) tərəfindən qəbul edilmiş və regionu “Sülh Zonası” elan edən bəyannamənin də nəzərə alınmadığına diqqət çəkilib.
Maduro, BMT Baş katibinə ünvanladığı məktubda: “Bəşəriyyət XXI əsrdə sülh və təhlükəsizliyi təhdid edən güc siyasətinin yenidən dirçəlməsinə imkan verə bilməz” deyib. Venesuela hökuməti isə ölkənin sülhə sadiq olduğunu vurğulayaraq, “heç vaxt güc tətbiqini və ya devredilməz hüquqlarının pozulmasını qəbul etməyəcəyini” açıqlayıb.
Venesuela, Karib dənizinə nüvə elementlərinin gətirilməsinin “yarımkürə sabitliyinə zərər vurduğunu, nüvə silahlarının yayılmaması və silahsızlanma rejiminə inamı sarsıtdığını” qeyd edib. 2014-cü ildə Havanada keçirilən CELAC Zirvəsində Latın Amerikası və Karib dənizi “Sülh Zonası” elan edilmiş və üzv ölkələr münaqişələrin sülh yolu ilə həllini təşviq etmək, güc tətbiqini rədd etmək barədə öhdəlik götürmüşdülər. ABŞ isə CELAC-a üzv ölkələr arasında yer almır.
