"Belçika müvafiq şərtlər yerinə yetirildikdə Ukrayna ərazisində öz hərbi qüvvələrini yerləşdirmək imkanını nəzərdən keçirəcək, lakin digər ərazilərdə də təhlükəsizlik təminatlarına töhfə verə bilər".
HİT.az xəbər verir ki, bu sözləri cümə günü Kopenhagendə Avropa İttifaqı müdafiə nazirlərinin "Gymnich" formatında qeyri-rəsmi görüşü başlamazdan əvvəl Belçikanın müdafiə naziri Teo Franken deyib.
"Ukraynaya PURL paketində daha 100 milyon avro ilə dəstək verməyə hazırlaşırıq. Belçika hökuməti bu həftə bu qərarı verdi. Əlimizdə olan hər şeylə Ukraynanı dəstəkləməyə davam edəcəyik. F-16 təyyarələri ən qısa zamanda təhvil veriləcək və biz "istəklilər koalisiyası"nda gələcəyə çox nikbin baxırıq. Biz bir çox sahələrdə, dənizdə və hərbi sahədə kömək edə bilərik", deyə nazir bildirib.
O əlavə edib ki, atəşkəs zəruri şərtdir, lakin onun sürətlə əldə olunmasına şəxsən şübhə ilə yanaşır.
Belçika qoşunlarının Ukrayna ərazisinə yerləşdirilməsinə gəlincə, nazir deyib: "Belçika üçün hər şey mümkündür. Bu, diplomatik müzakirədir. Birincisi, biz Rusiyanı sülh sazişi bağlamağa necə məcbur edəcəyimizə baxacağıq. Düşünürəm ki, sanksiyaları gücləndirməliyik və inanıram ki, bir çox paketlər artıq yoldadır. Avropa İttifaqı və bizim tərəfdaşımız, həmçinin ABŞ çox şey edə bilər".
Ukrayna qoşunlarının Ukrayna ərazisində təlim keçməsinə gəlincə, nazir deyib ki, o, təhlükəsizlik məsələlərinə görə belə bir addımın əleyhinədir: "Təlimatçılar Belçika əsgərləridir və hazırda bu risk çox yüksəkdir, ona görə də çətindir".
Samir
