BMT Təhlükəsizlik Şurası Livandakı UNIFIL sülhməramlı missiyasının 2026-cı ilin sonuna qədər başa çatdırılması və daha sonra personalın ölkədən çıxarılması barədə qərarı yekdilliklə dəstəkləyib.
Bu barədə "Reuters" məlumat yayıb.
Belə ki, qərar avqustun 28-də Fransa və ABŞ arasında aparılan danışıqlardan sonra Şuranın 15 üzvü tərəfindən qəbul edilib.
Beləliklə, UNIFIL-in mandatı 31 dekabr 2026-cı ilədək qüvvədə olacaq. Həmin tarixdən sonra isə sülhməramlıların mərhələli və təhlükəsiz şəkildə çıxarılmasına başlanacaq. Bu proses Livan hökuməti ilə sıx koordinasiya şəraitində həyata keçiriləcək.
Xatırladaq ki, 2024-cü ilin noyabrında ABŞ Livan və İsrail arasında atəşkəsin əldə olunmasında vasitəçilik etmişdi. Bu razılaşma Qəzza müharibəsi fonunda bir ildən artıq davam edən döyüşlərdən sonra mümkün olmuşdu. Vaşinqton "Hizbullah"ı tərksilah etmək və qrupun İran maliyyəsindən asılılığını azaltmaq üçün Körfəz ölkələrinin dəstəyi ilə Livanın cənubunda iqtisadi inkişaf zonası yaratmaq planını irəli sürür.
