İranın islahatçı partiyalarını birləşdirən “İslahat Cəbhəsi” ölkədə dərin siyasi və iqtisadi islahatlar proqramı ilə çıxış edib...
Poliqon xəbər verir ki, prezident Məsud Pəzeşkiyanı dəstəkləyən 30 islahatçı partiyanın daxil olduğu “İslahat Cəbhəsi” uranın zənginləşdirilməsinin müvəqqəti dayandırılması və MAQATE-nin beynəlxalq nəzarətinin qəbul edilməsi müqabilində sanksiyaların ləğvini təklif edib. Bəyanatda qeyd olunur ki, İran ciddi təhdidlər qarşısındadır, o cümlədən BMT sanksiyalarının “Snapback” mexanizmi ilə bərpa olunması riski var.
Cəbhə milli barışıq, azad seçkilər və beynəlxalq təcridin aradan qaldırılması da daxil olmaqla, dərin siyasi və iqtisadi islahatların yol xəritəsini təqdim edib. İslahatçılar xəbərdarlıq ediblər ki, dəyişikliklər baş verməsə, ölkəni yeni böhran dalğası və İsraillə son silahlı toqquşmaların dərinləşdirdiyi iqtisadi tənəzzül gözləyə bilər.
Təkliflər arasında siyasi məhbuslara amnistiya, müxalifət liderlərinin ev dustaqlığından azad edilməsi, ordunun depolitizasiyası və xarici siyasət islahatları var. Cəbhənin mövqeyinə görə, İranın xilas yolu ideoloji qarşıdurmadan imtina, milli birliyə üstünlük verilməsi və dünya ilə dialoqa əsaslanır.
Poliqon.info
