Bu gün Özbəkistan prezidenti Şavkat Mirziyoyevlə Azərbaycan prezidenti İlham Əliyev arasında telefon danışığı olub.
Hafta.az-ın yazdığına görə, Özbəkistanın dövlət başçısı tarixi hadisə - Vaşinqtonda Azərbaycanla Ermənistan arasında Sülh Bəyannaməsinin imzalanması münasibətilə Azərbaycan liderini və xalqını səmimi qəlbdən təbrik edib.
Yaxın gələcəkdə sülh sazişinin rəsmi imzalanmasının Cənubi Qafqazda sülhün, sabitliyin və rifahın təmin olunmasında böyük əhəmiyyət kəsb edəcəyinə əminlik ifadə olunub.
Eyni zamanda prezidentlər Şavkat Mirziyoyevin bu ilin iyulunda Azərbaycana dövlət səfəri zamanı əldə olunan razılaşmaları müzakirə ediblər. Xüsusilə, qarşılıqlı razılaşma çərçivəsində ikitərəfli strateji tərəfdaşlıq və müttəfiqlik münasibətlərinin daha da inkişaf etdirilməsi və möhkəmləndirilməsinin vacibliyi vurğulanıb.
"Bu ilin əvvəlindən ticarət dövriyyəsi 30 faiz artıb. "Yol xəritəsi" əsasında iqtisadiyyatın müxtəlif sahələrində perspektivli əməkdaşlıq layihələri formalaşdırılır. Neft-qaz sektorunda strateji layihə üzrə imzalanmış Məhsul Bölgüsü Sazişi çərçivəsində praktiki işlər aparılır", - mənbə bildirib.
Prezidentlər, həmçinin qarşıdan gələn yüksək səviyyəli görüş və tədbirlər planına da nəzər salıblar.
Məlumat üçün bildirək ki, təxminən 37 illik münaqişədən sonra Azərbaycan prezidenti İlham Əliyev və Ermənistanın baş naziri Nikol Paşinyan Vaşinqtonda ABŞ prezidenti Donald Trampın iştirakı ilə sülh bəyannaməsi imzalayıblar. Bəyannamədə artıq razılaşdırılmış sülh müqaviləsinin imzalanması və ratifikasiyası prosesinin sürətləndirilməsinin zəruriliyi vurğulanıb. Bəyannamədə həmçinin regionda əlaqələrin bərpasının və Azərbaycanın əsas ərazisi ilə onun Naxçıvan anklavı arasında Ermənistan ərazisindən keçən, İranla sərhədi boyunca nəqliyyat dəhlizinin yaradılması da qeyd olunub.
Xatırladaq ki, bundan əvvəl Özbəkistan Xarici İşlər Nazirliyi də sülh Bəyannaməsini alqışlayan bəyanat yayıb.
"İnanırıq ki, Vaşinqtonda tarixi birgə bəyannamənin imzalanması Azərbaycan və Ermənistan liderlərinin güclü siyasi iradəsi və qətiyyəti, habelə Amerika Birləşmiş Ştatları prezidentinin fəal sülhyaratma səyləri sayəsində əldə edilib. Biz uzun müddətdir davam edən münaqişənin həlli üçün bütün tərəflərin səylərini yüksək qiymətləndiririk. Əminik ki, Qafqaz geniş regionumuzun bütün xalqlarının mənafeyi naminə böyük nəqliyyat və infrastruktur layihələrinin həyata keçirilməsi üçün zəmin yaradacaq”, - nazirliyin bəyanatında deyilir.
