Sosial şəbəkələr təmizləyiciləri zibillikdə saat axtarmağa məcbur edən çinli məmurları qınayıb
“South China Morning Post” yazır ki, Çin səlahiyyətliləri uşaqların ağıllı saatlarını tapmaq üçün istidə dörd saat ərzində təmizlik işçilərini zibilləri ələkdən keçirməyə məcbur etdiyinə görə tənqid olunub.
Çinin Datun şəhərinin yerli hakimiyyət orqanları turistlərdən birinin övladının itirdiyi smart saatın axtarışı üçün genişmiqyaslı əməliyyat təşkil etdikdən sonra internetdə geniş tənqid edilib. Əməliyyat zamanı iki təmizləyici həddindən artıq istidə səkkiz ton zibili əllə qazmalı olub.
Hadisə övladı ilə Datun şəhərinə səfər edən Şençjenli ananın səhvən oğlunun saatını qatarın göyərtəsindəki zibil torbasına atması nəticəsində baş verib. Qurğunun yerləşdirmə funksiyası var idi ki, bu da onun hələ də dəmiryol vağzalında olduğunu göstərirdi.
Ertəsi gün qadın kömək üçün yerli bələdiyyə idarəsinə müraciət edib. İşçilər tullantıların utilizasiyası ilə məşğul olan dövlət müəssisəsi olan Xincheng Environment Company ilə əlaqə saxlayıb və məlum olub ki, saat səkkiz ton zibillə birlikdə poliqona aparılıb.
İki işçiyə tapşırılıb ki, itirilmiş cihazı tapmaq üçün bütün zibilləri əl ilə ələkdən keçirsinlər. Qadceti tapmaq üçün onlara dörd saatdan çox vaxt lazım olub. Ana onlara mükafat verməyi təklif etsə də, işçilər puldan imtina ediblər.
Hakimiyyət bu hadisəni “turistlərə qarşı həssas münasibət” və “dövlət xidməti nümunəsi” kimi təqdim etməsinə baxmayaraq, Çində internet istifadəçiləri yerli məmurların hərəkətlərini tənqid ediblər.
Şərhçilərdən biri belə yazıb: "Mən şokdayam ki, bu qədər kiçik bir şey üçün belə nəhəng səylər göstərildi. "Mən sadəcə başa düşmürəm".
