"Ukraynanın sənaye və enerji infrastrukturuna sistemli zərbələr davam edir..."
İyunun 24-də Ukraynanın bir neçə şəhərində, o cümlədən Xarkov və Dneprdə Rusiyanın yeni hücumları qeydə alınıb. Xüsusilə Xarkovda gecə saatlarında ardıcıl partlayışlar baş verib.
Moderator.az xəbər verir ki, bu barədə "nv.ua" nəşri məlumat yayıb.
Şəhər meri İqor Terexovun məlumatına görə, Rusiyaya məxsus yeddi dron şəhərin Kiyev rayonu istiqamətində yerləşən sənaye müəssisəsinə zərbələr endirib.
Partlayışlar nəticəsində ciddi infrastruktur ziyanı və yanğınların olduğu bildirilir, lakin itkilərlə bağlı dəqiq məlumat hələlik açıqlanmayıb. Hücum zamanı hava həyəcanı siqnalı səsləndirilib və əhalidən sığınacaqlara keçmələri istənilib. Bu, artıq son aylarda Xarkovda sayca onlarla belə hücumdan yalnız biridir.
Dnepr də hədəfdə olub
Ukrayna Ali Radasının deputatı Maksim Bujanski isə bildirib ki, həmin gün Dnepr şəhərində də azı beş partlayış baş verib. Şəhər rəhbərliyi partlayışların nəticələrini dəqiqləşdirir, ilkin məlumatlara görə yaşayış sahələri zərər görməyib, lakin bir neçə infrastruktur obyektində dağıntılar var.
Enerji və sənaye obyektlərinə sistemli hücumlar
2022-ci ilin oktyabrında Kerç körpüsündə baş verən partlayışdan sonra Rusiya Ukraynanın enerji, hərbi və sənaye infrastrukturlarına sistematik hücumlara başlayıb. Bu kampaniya çərçivəsində demək olar ki, bütün ölkə boyu hava həyəcanı siqnalları artıq gündəlik hadisəyə çevrilib.
Rusiya Müdafiə Nazirliyi bu hücumların hərbi infrastruktur, müdafiə sənayesi obyektləri və komanda-əlaqə şəbəkələrinə yönəldiyini iddia etsə də, faktlar tez-tez mülki ərazilərin və yaşayış binalarının da zərbə altına düşdüyünü göstərir.
Bir müddət öncə rusiyalı hərbi müxbirlərdən biri Kiyevə endirilən "ən güclü zərbələrdən biri" barədə məlumat yayıb. Bu isə onu göstərir ki, Rusiya artıq təkcə cəbhə xəttində deyil, Ukraynanın dərinliklərində yerləşən şəhərlərə qarşı da yüksək intensivlikli hücumlara üstünlük verir.
Müharibənin növbəti mərhələsi görünür ki, təkcə döyüş meydanında deyil, enerji sistemlərinin çökməsi və sənaye istehsalının iflici üzərindən aparılır. Hər iki tərəf isə bu mərhələdə artıq daha strateji və psixoloji üstünlük qazanmağa çalışır.
