2022-ci ildə Ukraynanı işğal etdikdən sonra ağır sanksiyalarla üzləşən Rusiya gözlənilməz iqtisadi möhkəmlik nümayiş etdirdi, lakin 2026-cı ilə yaxınlaşdıqca mənzərə dəyişməyə başladı.
Böyük Britaniyada yerləşən BBC-nin təqdim etdiyi məlumatlara görə, Rusiya iqtisadiyyatı 2023-cü ildə bütün G7 ölkələrini geridə qoyaraq 4,3 faiz artıb. Eyni dövrdə ABŞ iqtisadiyyatı 2,8 faiz, Böyük Britaniya isə cəmi 1,1 faiz artıb. Kremlin rekord qıran hərbi xərcləri artımın əsas hərəkətverici qüvvəsi kimi önə çıxır.
Qərbin sanksiyalarından sonra Avropa bazarını böyük ölçüdə itirən Moskva neft daşımalarını Çin və Hindistan kimi Asiya ölkələrinə yönəltməklə enerji ixracatında sabitliyi qoruyub. Digər tərəfdən sahibi və marşrutu bəlli olmayan “kölgə donanması” kimi tanınan tanker şəbəkəsinin sanksiyalardan yayınmada təsirli olduğu bildirilir.
Bununla belə, Rusiya rublu 2024-cü ildə 40 faizdən çox dəyər qazanaraq onu dünyanın ən yaxşı pul vahidi edib. “Bank of America” bunu kapitala nəzarət və yüksək faiz siyasəti ilə əlaqələndirir.
Bununla belə, iqtisadi artım daxili balanslara ciddi təzyiq göstərib. Daimi yüksək inflyasiya faiz dərəcələrinin 20 faizə yüksəlməsinə səbəb olub, şirkətlər isə getdikcə daha çox işçi çatışmazlığı yaşayır.
Moskva İqtisadiyyat Məktəbinin məlumatlarına görə, 2024-cü ilin sonuna qədər Rusiyada təxminən 2,6 milyon nəfər işçi qüvvəsi çatışmazlığı yaranacaq. Bunun əsas səbəbləri kişi əhalinin müharibə ilə əlaqədar cəbhəyə getməsi və ya xaricə qaçmasıdır.
Rusiyanın İqtisadiyyat naziri Maksim Reşetnikov bu yaxınlarda ölkə iqtisadiyyatının “həddən artıq istiləşmədən” sonra tənəzzülə yaxınlaşdığını açıqlayıb.
