Yay mövsümünün gəlişi ilə Azərbaycanda da bir çox insan istidən qorunmaq və sərinləmək üçün müxtəlif soyuq içkilərə, xüsusilə də pivəyə üstünlük verir. Bu içki təkcə dost məclislərində deyil, gündəlik rahatlama vasitəsi kimi də geniş istifadə olunur. Maraqlıdır ki, dünyanın müxtəlif ölkələrində aparılan elmi tədqiqatlar pivənin bəzi hallarda sağlamlıq üçün faydalı ola biləcəyini ortaya çıxarıb.
Yenisabah.az pivənin faydalarını təqdim edir:
Pivə əsasən dörd əsas komponentdən hazırlanır: su, arpa və ya digər taxıllar, xmeyl (humulus bitkisi) və maya. Bu komponentlərin fermentasiyası nəticəsində tərkibində bioloji cəhətdən aktiv maddələr olan içki əldə edilir. Xüsusilə təbii və sənaye üsulu ilə süzülməmiş pivələr faydalı maddələr baxımından daha zəngin hesab olunur.
Vitamin və minerallarla zəngin içki
Pivə B qrupu vitaminləri ilə zəngindir. Onun tərkibində B1, B2, B3, B6 və fol turşusu kimi vitaminlər var ki, bu da sinir sisteminin normal fəaliyyəti, yorğunluğun azaldılması və enerji səviyyəsinin yüksəlməsi üçün önəmlidir.
Bundan əlavə, pivə orqanizm üçün vacib hesab edilən silikon mineralları ilə də zəngindir. ABŞ-da aparılan araşdırmalara görə, pivə içən şəxslərdə sümük sıxlığının daha yüksək olduğu müşahidə olunub ki, bu da osteoporozun qarşısının alınmasında əhəmiyyətli rol oynayır.
Ürək və qan dövranına təsiri
Araşdırmalar göstərir ki, az miqdarda pivə qəbulu ürək-damar sisteminə müsbət təsir edir. Belə ki, müntəzəm, lakin normadan artıq olmayan pivə istifadəsi “yaxşı xolesterin” kimi tanınan HDL səviyyəsini artırır və damar elastikliyini qoruyur. Eyni zamanda, pivənin tərkibindəki antioksidant maddələr ürək üçün qoruyucu təsir göstərir.
Böyrəklər və həzm sistemi üçün faydaları
Pivənin təbii sidikqovucu təsiri var və bu xüsusiyyət artıq maye və duzların orqanizmdən atılmasına kömək edir. Böyrəklərin fəaliyyətini gücləndirməklə yanaşı, xüsusilə təbii və süzülməmiş pivələr probiotik təsir göstərərək bağırsaq florasının balansını qorumağa və həzm sisteminin normal fəaliyyətini dəstəkləməyə yardımçı olur.
Hər şeyin bir ölçüsü var
Bütün bu faydalarına baxmayaraq, mütəxəssislər pivənin nəzarətsiz və həddən artıq istifadəsinin sağlamlıq üçün ciddi təhlükə yarada biləcəyini bildirir. Yüksək miqdarda alkoqol tərkibli pivə qaraciyər problemlərinə, piylənməyə və alkoqol asılılığına səbəb ola bilər.
Dünya Səhiyyə Təşkilatı pivə qəbulunda müəyyən limitlərə əməl etməyi tövsiyə edir. Belə ki, sağlam yetkin şəxslər üçün gündəlik pivə qəbulunun kişilər üçün maksimum 500 ml, qadınlar üçün isə 250 ml olması məsləhət görülür. Bu miqdar təhlükəsiz və sağlamlıq üçün faydalı hesab edilir.
Qeyd edək ki, yay aylarında bumbuz pivə içmək bir çoxları üçün sərinlədici və rahatladıcı vərdişdir. Lakin bu içkinin həm sosial, həm də sağlamlıq baxımından düzgün və ölçülü istifadəsi vacibdir. Pivənin faydaları yalnız normaya uyğun miqdarda və keyfiyyətli formada qəbul edildikdə özünü göstərir. Əks halda isə sağlamlıq üçün ciddi fəsadlar qaçınılmaz ola bilər.
Rəvan Rzazadə
Telegram kanalımız
