Qlobal maliyyə bazarlarını kökündən sarsıdacaq və bəşəriyyət tarixində yeni bir milyardlar erasının qapısını açacaq misli görünməmiş iqtisadi gəlişmə baş verib. Dünyanın ən zəngin adamı İlon Maskın rəhbərlik etdiyi kosmik imperiya birjalara daxil olmaq üçün rəsmi addım atıb.
Musavat.com xəbər verir ki, kosmik texnologiyalar sahəsində dünya lideri olan "SpaceX" şirkəti səhmlərinin ilkin ictimai yerləşdirilməsi (IPO) üçün rəsmən sifariş verib və bu tarixi gediş İlon Maskı planetin ilk rəsmi trilyoneri edə bilər. Şirkət rəhbərliyi hələlik gözlənilən bazar dəyərini və qiymətli kağızların yerləşdirilmə qiymətini ictimaiyyətə açıqlamasa da, pərdəarxası rəqəmlər artıq dünya mediasına sızıb. Dünyanın ən nüfuzlu iqtisadi nəşrlərindən olan "The Wall Street Journal"ın (WSJ) məlumatına görə, "SpaceX" rəhbərliyi IPO prosesi zamanı şirkətin ümumi bazar dəyərinin bir trilyon yarım (1.5 trilyon) dollar və daha yuxarı qiymətləndiriləcəyini gözləyir. Qeyd edək ki, cari ilin fevral ayında "SpaceX" İlon Maskın digər süni intellekt startapı olan "xAI"ı özünə birləşdirib və bu birləşmədən sonra nəhəng korporasiyanın dəyəri 1.25 trilyon dollar kimi hesablanıb.
Nüfuzlu "Bloomberg" agentliyinin ekspertlərinin hesablamalarına görə isə, "SpaceX" şirkətinin IPO həcmi təkbaşına yetmiş beş milyard (75 milyard) dollara çata bilər. Bu isə o deməkdir ki, İlon Maskın kosmik nəhəngi 2019-cu ildə Səudiyyə Ərəbistanının neft nəhəngi "Saudi Aramco" şirkətinin 29 milyard dollarlıq tarixi birja rekordunu iki dəfədən də çox üstələyərək darmadağın edəcək. Bu böyük maliyyə gedişi təkcə kosmik sənayeni deyil, bütün dünya birja sistemini yenidən formalaşdıracaq.
Musavat.com
