Bakı, 17 aprel, AZƏRTAC
Beynəlxalq Enerji Agentliyinin (BEA) icraçı direktoru Fatih Birol cümə günü bildirib ki, Yaxın Şərqdə enerji istehsalının müharibədən əvvəlki səviyyəyə qayıtması üçün təxminən iki il vaxt lazımdır. O, həmçinin təcili neft ehtiyatlarının daha çox həcmdə buraxılması variantının da nəzərdən keçirildiyini qeyd edib.
AZƏRTAC xəbər verir ki, Birol İsveçrənin alman dilində nəşr olunan “Neue Zurcher Zeitung” qəzetinə müsahibəsində bildirib ki, hasilatın bərpası ölkələr arasında fərqli olacaq. Onun sözlərinə görə, İraqda bu prosesin Səudiyyə Ərəbistanından daha uzun çəkəcəyi ehtimal olunur, baxmayaraq ki, region ümumilikdə təxminən iki il ərzində müharibədən əvvəlki istehsala qayıda bilər.
O, Hörmüz boğazının yenidən açılmasını istehsalı əhəmiyyətli dərəcədə artıracağını qeyd edib, lakin vurğulayıb ki, hasilatın tam gücünə çatması vaxt aparacaq.
Birol əlavə edib ki, BEA mart ayında təcili ehtiyatlardan 400 milyon barel neft buraxdıqdan sonra tarixin ən böyük azalması fonunda lazım gələrsə, yenidən hərəkətə keçməyə hazırdır. O, ehtiyatlardan daha bir buraxılışın hələ zəruri olmadığını, Agentliyin bazarları yaxından izlədiyini, resursları aktiv şəkildə nəzərdən keçirdiyini bildirib. Birol vurğulayıb ki, ehtiyat buraxılışları yalnız qısamüddətli maneələri aradan qaldıra bilər, enerji təchizatının sabitləşməsi üçün ən vacib addım isə Hörmüz boğazının yenidən açılmasıdır. O əlavə edib ki, bu dəniz marşrutunun tam şəkildə açılmasına kömək edəcək hər hansı bir addım müsbət nəticələr verəcək.
Agentliyin rəhbəri, həmçinin bildirib ki, boğazın yenidən açılmasından sonra belə, bazarlar dərhal normal vəziyyətinə qayıda bilməyəcək.
