Film və serial platforması Netflix-in gəliri bu ilin ilk rübündə 16,2 % artaraq 12,3 milyard dollara yüksəlib.
Netflix 2026-cı ilin ilk rübünə dair maliyyə hesabatını açıqlayıb.
Marja xəbər verir ki, şirkətin gəliri bu ilin ilk rübündə ötən ilin eyni dövrü ilə müqayisədə 16,2 % artaraq 12,3 milyard dollar təşkil edib. Şirkətin gəliri 2025-ci ilin ilk rübündə 10,5 milyard dollar olmuşdu.
Şirkət bu ilin ikinci rübündə gəlirlərinin 13 % artacağını gözlədiyini bildirib və 2026-cı il üzrə ümumi gəlir proqnozunu 50,7 milyard dollar – 51,7 milyard dollar aralığında saxlayıb.
Netflix-in xalis mənfəəti də ilin ilk rübündə ötən ilin eyni dövrü ilə müqayisədə təxminən 83 % artaraq 5,3 milyard dollara yüksəlib. Şirkətin xalis mənfəəti 2025-ci ilin eyni dövründə 2,9 milyard dollar olmuşdu.
Şirkətin ötən ilin ilk rübündə 0,66 dollar olan səhmbaşına mənfəəti isə bu dövrdə 1,23 dollara çatıb.
Netflix-in mənfəətindəki artımda Warner Bros.-un satın alınmasına dair razılaşmanın pozulması nəticəsində ödənilən 2,8 milyard dollarlıq müqavilə pozuntusu cəriməsi də müsbət təsir göstərib.
Şirkətin mənfəəti və gəliri bazar gözləntilərindən daha yüksək olub.
Şirkətin açıqlamasında bildirilib ki, sədr Reed Hastings xeyriyyə fəaliyyəti və digər fəaliyyətlərə diqqət yetirmək üçün hazırkı səlahiyyət müddəti iyunda başa çatdıqdan sonra İdarə Heyətinin sədri vəzifəsinə yenidən namizəd olmayacaq.
Netflix film və seriallar platformasıdır. Belə ki, film və serialları onlayn olaraq smart televizorunuzda, kompüterinizdə, mobil telefonunuzda, planşetinizdə və digər cihazlarınızda izləyə bilərsiniz.
