MüəlliF:Mehin Qasımova,Banco.az
Pakistanda Yaxın Şərqdə davam edən müharibənin təsiri ilə mayeləşdirilmiş təbii qaz (LNG) tədarükünün azalması genişmiqyaslı elektrik kəsintilərinə səbəb olub.
Banco.az xəbər verir ki, yerli mənbələrə əsasən, ölkənin bəzi bölgələrində elektrik kəsintiləri 14 saata qədər davam edir. Xüsusilə kənd yerlərində vəziyyət daha ağırdır və enerji təchizatında ciddi fasilələr müşahidə olunur.
Məlumata görə, Pakistan yaxın günlərdə də LNG təchizatında yaranmış problemlər səbəbindən elektrik kəsintilərinin davam edəcəyini gözləyir. Yaxın Şərqdəki münaqişə fonunda Hörmüz boğazı faktiki olaraq bağlanıb ki, bu da enerji daşımalarına ciddi təsir göstərib.
Bundan əlavə, Qatar mart ayının əvvəlində baş verən hücumlardan sonra dünyanın ən böyük LNG ixrac obyektlərindən birindən tədarükü dayandırmaq məcburiyyətində qalıb. Bu isə Pakistan kimi idxaldan asılı ölkələr üçün enerji böhranını daha da dərinləşdirib.
Enerji Nazirliyi bildirib ki, su elektrik stansiyalarında istehsalın azalması da vəziyyəti ağırlaşdırır. Rəsmi açıqlamaya görə, bəzi ərazilərdə axşam saatlarında elektrik kəsintiləri iki saatdan çox davam edir. Lakin yerli məlumatlar fasilələrin daha uzun — bəzən 14 saata qədər sürdüyünü göstərir.
Qeyd edək ki, Pakistan elektrik enerjisi istehsalı üçün istifadə etdiyi LNG-nin böyük hissəsini Qatardan idxal edir. Mövcud vəziyyət isə ölkəni son illərin ən ciddi enerji böhranlarından biri ilə üz-üzə qoyub.
