ABŞ-dəki Corctaun Universitetində aparılan araşdırmada sosial media detoksunun zehni fəaliyyətə təsiri öyrənilib.
“Cebheinfo.az” xəbər verir ki, sosial mediadan iki həftəlik uzaqlaşmanın beyində 10 illik idrak geriləməsini geri çevirməkdə təsirli olduğu müəyyən edilib.
Belə ki, tədqiqat çərçivəsində 467 yetkin şəxs 14 gün ərzində telefonlarında internetə çıxışı tamamilə dayandırıb. Onlara yalnız zəng və mesajlaşma funksiyalarından istifadə etməyə icazə verilib.
Bununla da iştirakçılar sanki smartfonlar əvəzinə köhnə, klaviaturalı telefon dövrünün həyat tərzinə qayıdıblar.
Bu sahədə aparılan ən geniş tədqiqatlardan biri hesab olunan araşdırmanın nəticələri diqqətçəkici olub. İştirakçıların gündəlik ekran müddəti 5 saatdan 3 saatdan aşağı düşüb. Depressiya əlamətlərində azalma müşahidə olunub, diqqət müddəti isə artıb.
Bəzi hallarda əldə olunan nəticələrin antidepresant müalicələrin təsirinə yaxın olduğu bildirilib. Telefon istifadəsi azaldıqca insanlar vaxtlarını daha çox üzbəüz ünsiyyətə, fiziki fəaliyyətə, təbiətdə vaxt keçirməyə və kitab oxumağa ayırıblar.
Tədqiqatçılar bu dəyişiklikləri yaşla əlaqəli idrak geriləməsinin təxminən 10 il geri qaytarılması ilə müqayisə ediblər.
Mütəxəssislər vurğulayırlar ki, sosial media və oxşar tətbiqlər qısa müddətli “mükafat” hissi yaradaraq diqqəti parçalayır və beyni daim stimullaşdırılmış vəziyyətdə saxlayır.
Araşdırma başa çatdıqdan sonra belə, iştirakçıların bir qismi əvvəlki ekran vərdişlərinə qayıtmayıb.
