ABŞ və İran arasında atəşkəs elan edildikdən sonra Hörmüz boğazının açılması dünya iqtisadiyyatı üçün mənfi fəsadların dərhal dayanmasına səbəb olmayacaq, böhranın əks-sədası hələ bir neçə ay ərzində hiss ediləcək.
AFN.az xarici mediaya istinadən xəbər verir ki, bu barədə Niderlandın xarici işlər naziri Tom Berendsen bəyanat verib. "Hətta boğaz yenidən açılsa və açıq qalsa belə, dünya iqtisadiyyatı, onunla birlikdə isə Niderland yaxın aylarda bu böhranın nəticələrini hiss etməkdə davam edəcək", — deyə o, NOS telekanalına müsahibəsində bildirib.
Bununla belə, Berendsen münaqişə tərəfləri arasındakı barışığı alqışlayıb və qeyd edib ki, Niderland deeskalasiyanın tərəfdarıdır. Buna baxmayaraq, onun sözlərinə görə, hələlik atəşkəs rejiminin dayanıqlılığı və şərtləri ilə bağlı qeyri-müəyyənlik qalmaqdadır.
Nazir həmçinin vurğulayıb ki, Haaqa Hörmüz boğazında gəmilərin hərəkət azadlığının təmin edilməsində iştirakla bağlı hələlik rəsmi müraciət almayıb, baxmayaraq ki, daha əvvəl belə bir imkanı nəzərdən keçirməyə hazır olduğunu bəyan etmişdi. XİN rəhbəri əlavə edib ki, Niderland hökuməti həmçinin Livandakı humanitar vəziyyətdən narahatlığını ifadə edir və bu ölkədə hərbi əməliyyatların tezliklə dayandırılmasına çağırır.
