Budapeşt, 4 aprel, AZƏRTAC
Macarıstan mediası enerji bazarlarında artan həyəcan siqnalları qeydə alır ki, bu da mövcud vəziyyətin əvvəllər göründüyündən daha dərin bir böhrana çevrilə biləcəyini göstərir.
AZƏRTAC Macarıstan informasiya agentliklərinə istinadla xəbər verir ki, İranla bağlı münaqişənin kəskinləşməsi və Hörmüz boğazının bağlanması qlobal enerji təchizatında sabitliyi bir daha pozub. Avropa İttifaqı formal olaraq bu marşrutdan təchizat baxımından 2022-ci il böhranı dövründə olduğundan daha az asılı olsa da, ekspertlər sabitlik hissinin xəyali ola biləcəyi barədə xəbərdarlıq edirlər.
Medianın məlumatına görə, qlobal mayeləşdirilmiş təbii qaz təchizatının təxminən 20 faizi boğazdan keçir, lakin Aİ-nin payı cəmi 8 faizdir. Bu, dərhal baş verə biləcək çatışmazlıq riskini azaldır, lakin qiymətlərin artmasından qorumur. Münaqişə davam edərsə, enerji qiymətlərinin artması Avropa üçün milyardlarla dollarlıq əlavə xərclərə və iqtisadi rəqabətin daha da azalmasına səbəb ola bilər. Macarıstan mediasının digər xəbərlərində bunun əsasən təchizat böhranı olduğu, Avropa siyasətinin isə tələbatın məhdudlaşdırılmasına yönəldiyi vurğulanır. Bu yanaşma bazarın struktur problemlərini həll etməyən müvəqqəti tədbir kimi qəbul edilir.
Artan neft qiymətləri təzyiqi artırır: analitiklər Yaxın Şərqdəki gərginlik fonunda neftin bir barelinin qiymətinin 120-150 dollara qədər qalxa biləcəyi barədə xəbərdarlıq edirlər.
Bu məsələlərlə bağlı Macarıstan mediası ortaq məxrəcə gəlir: Avropa uzunmüddətli enerji qeyri-müəyyənliyi dövrünə qədəm qoyur və burada əsas çətinliklər yüksək qiymətlər, idxaldan asılılıq və yeni qlobal şərtlərə uyğunlaşmaq zərurəti olacaq.
