ain.az, Bizimyol portalına istinadən məlumat yayır.
Bayram günlərində Bakının küçələri sanki nəfəs alır. Hər gün sıxlıqdan, tıxaclardan şikayət edən paytaxt sakinləri bu günlərdə fərqli mənzərə ilə qarşılaşırlar. Şəhərin əsas yollarında nəqliyyatın azalması həm sürücülər, həm də piyadalar üçün rahatlıq yaradır.
Son günlər sosial şəbəkələrdə yayılan bir video bu vəziyyəti açıq şəkildə göstərir. Xırdalandan şəhər mərkəzi istiqamətində hərəkət edən bir sürücü bildirir ki, o, cəmi 5 dəqiqəyə 20 Yanvar dairəsinə çatıb. Halbuki adi günlərdə bu məsafəni qət etmək üçün bəzən 1 saat 40 dəqiqə vaxt tələb olunur. Bu fərq Bakıda nəqliyyat sıxlığının real miqyasını bir daha ortaya qoyur.
Mütəxəssislər hesab edir ki, bayram günlərində əhalinin bir hissəsinin bölgələrə üz tutması, həmçinin iş və təhsil müəssisələrinin fəaliyyətini dayandırması şəhərdəki avtomobil sayını ciddi şəkildə azaldır. Nəticədə yollar boşalır, hərəkət sürətlənir və tıxac problemi minimuma enir. Bu müşahidələr bir daha göstərir ki, Bakının əsas problemlərindən biri nəqliyyat yükünün həddindən artıq olmasıdır. Paytaxtda avtomobillərin sayının sürətlə artması, ictimai nəqliyyatın yetərincə cəlbedici olmaması və şəhərsalma planlamasındakı çatışmazlıqlar bu vəziyyəti daha da ağırlaşdırır.
Ekspertlər çıxış yolu kimi bir neçə vacib istiqaməti önə çəkirlər. İlk növbədə ictimai nəqliyyatın keyfiyyəti və əlçatanlığı artırılmalıdır. Metro və avtobus şəbəkəsinin genişləndirilməsi, intervalın azaldılması və rahatlığın yüksəldilməsi vətəndaşları şəxsi avtomobildən istifadədən çəkindirə bilər. Bununla yanaşı, şəhərə girişin müəyyən məhdudiyyətlərlə tənzimlənməsi, parklanma siyasətinin sərtləşdirilməsi və alternativ nəqliyyat vasitələrinin velosiped və piyada infrastrukturunun inkişafı da vacibdir.
Digər mühüm məsələ isə iş yerlərinin və təhsil müəssisələrinin paytaxtdan kənara paylanmasıdır. Bütün yükün Bakının üzərində cəmlənməsi hər gün minlərlə insanın eyni istiqamətdə hərəkət etməsinə səbəb olur. Regional inkişafın gücləndirilməsi isə bu axını balanslaşdıra bilər.
Bayram günlərində müşahidə olunan boş yollar əslində bir siqnaldır. Əgər düzgün planlama və idarəetmə tətbiq olunsa, Bakı daha rahat və yaşanıla bilən şəhərə çevrilə bilər. Əks halda, qısa müddətli bu rahatlıq yalnız bayram günlərinin “lüksu” olaraq qalacaq.
Leyla Mirzə, Bizimyol.info
Sonrakı hadisələr barədə daha çox məlumat almaq üçün ain.az saytını izləyin.
