Birləşmiş Ərəb Əmirliklərinin paytaxtı Əbu-Dabi şəhəri İrandan atılan ballistik raketlərin hədəfinə çevrilib, hava hücumundan müdafiə sistemləri tərəfindən zərərsizləşdirilən raketin qalıqlarının yerə düşməsi nəticəsində 5 nəfər xəsarət alıb.
Musavat.com xəbər verir ki, "Reuters" və regional media qurumlarının yaydığı məlumata görə, hadisə şəhərin strateji sənaye mərkəzi olan "AD Ports Group"un tərkibindəki Xəlifə İqtisadi Zonalarında (KEZAD) baş verib. Əmirlik rəsmiləri bildiriblər ki, raket qalıqlarının düşməsi nəticəsində ərazidə iki böyük yanğın qeydə alınıb. Yaralananların hamısının Hindistan vətəndaşları olduğu və onlara dərhal tibbi yardım göstərildiyi bildirilir. Yanğınsöndürmə briqadaları KEZAD ərazisindəki alovu söndürmək üçün saatlarla mübarizə aparıblar.
Qeyd edək ki, bu hücum İranın Körfəz ölkələrindəki ABŞ hərbi və iqtisadi infrastrukturuna qarşı başlatdığı genişmiqyaslı əməliyyatın bir hissəsidir. BƏƏ Müdafiə Nazirliyi bəyan edib ki, ölkənin hava hücumundan müdafiə qüvvələri İrandan gələn qanadlı raketlər və PUA-ları uğurla dəf edir, lakin qalıqların yaşayış və sənaye zonalarına düşməsi riskini tam aradan qaldırmaq mümkün deyil. Analitiklər vurğulayırlar ki, KEZAD kimi mühüm iqtisadi mərkəzin hədəf alınması qlobal logistika və enerji təhlükəsizliyinə birbaşa təhdiddir. Hadisədən sonra Əbu-Dabidə təhlükəsizlik tədbirləri ən yüksək səviyyəyə qaldırılıb, sakinlərdən rəsmi məlumatlara etibar etmək və şayiələrə uymamaq xahiş olunub.
Musavat.com
