“Sankalp” missiyası çərçivəsində tanker və qazdaşıyanların təhlükəsizliyi təmin olunur...
Hindistan hökuməti Hörmüz boğazı yaxınlığına yarımdan çox hərbi gəmi göndərərək öz neft və qaz tankerlarının təhlükəsiz müşayiətini təşkil edir.
Poliqon xəbər verir ki, bu barədə Bloomberg Agentliyi məlumat yayıb.
Məlumata görə, hərbi gəmilər əsasən boğazın şərq hissəsində fəaliyyət göstərəcək və kommersiya gəmilərini təhlükəsiz sulara qədər müşayiət edəcək. Bu addım “Sankalp” adlı xüsusi təhlükəsizlik missiyası çərçivəsində həyata keçirilir.
Bildirilib ki, artıq iki qazdaşıyan gəminin təhlükəsiz keçidi təmin olunub. Bununla belə, Fars körfəzində hələ də onlarla Hindistana məxsus gəmi qalmaqdadır və onların təhlükəsiz hərəkəti üçün tədbirlər davam etdirilir.
Eyni zamanda, Hindistan rəsmiləri İranla danışıqlar apararaq gəmi keçidlərinin davam etdirilməsi ilə bağlı razılaşmalar əldə etməyə çalışır. Bu danışıqlar regionda artan gərginlik fonunda strateji əhəmiyyət daşıyır.
Analitiklər qeyd edirlər ki, Hindistanın bu addımı enerji təchizatının təhlükəsizliyini qorumağa yönəlib. Hörmüz boğazı qlobal neft və qaz daşımalarının əsas marşrutlarından biri olduğundan, burada baş verən hər hansı risklər dünya enerji bazarına birbaşa təsir göstərir.
Poliqon.info
