"The Insider" nəşri xaricdə siyasi sui-qəsdlər və adam oğurluğu həyata keçirən gizli Rusiya bölməsi olan "Center 795" ilə bağlı araşdırma dərc edib.
Musavat.com xarici mediaya istinadla xəbər verir ki, istintaq "Der Spiegel" ilə birgə hazırlanıb. Jurnalistlərin sözlərinə görə, "Center 795" 2022-ci ilin dekabrında yaradılıb və BKİ (Baş Kəşfiyyat İdarəsi – rusca: QRU) zabitləri, Federal Təhlükəsizlik Xidmətinin "Alfa" və "Vympel" xüsusi təyinatlı dəstələrinin üzvlərini əhatə edir.
Hesabatın dərc edilməsinin səbəblərindən biri də mərkəzin əməkdaşı Denis Alimovun 24 fevralda Kolumbiya hava limanında həbs olunması olub. O, Kreml əleyhdarlarının, o cümlədən Böyük Britaniyada siyasi mühacir kimi yaşayan keçmiş çeçen siyasətçisi və hərbi komandir Əhməd Zakayevin qohumlarının oğurluğunu təşkil etməkdə şübhəli bilinir.
"The Insider"in məlumatına görə, Alimov əməkdaşlığa cəlb olunmuş agentlə ünsiyyət qurarkən səhvə yol verib: yazışmalar üçün "Google Translate"dən istifadə edib. Nəticədə, ABŞ-nin Federal Təhqiqat Bürosu xidmətin serverlərini izləmək üçün order alıb və şifrələnmiş mesajlaşma tətbiqləri vasitəsilə göndərilsə də, açıq mətn mesajlarını oxuya bilib.
Alimov hazırda Kolumbiyadan ABŞ-a ekstradisiya olunacağını gözləyir. Günahkar bilinərsə, o, ömürlük həbs cəzası ilə üzləşə bilər.
Nəşrin məlumatına görə, 795-ci mərkəz “Patriot” parkında, “Rostec”in bir hissəsi olan “Kalaşnikov” konserninin təlim mərkəzinin ərazisində yerləşir. İstintaqa görə, maliyyələşdirməni “Kalaşnikov” şirkətinin həmsahibi Andrey Bokarev təmin edir.
Bölmənin sərəncamında sayı təxminən 500 nəfər killer və adam oğrusu olduğu iddia edilir. Müəlliflərin sözlərinə görə, onlar üç sahəyə bölünür: kəşfiyyat, hücum və döyüş dəstəyi.
Jurnalistlər həmçinin strukturun iddia edilən liderlərinin adlarını çəkiblər. Əsas fiqurlar arasında mərkəzin rəhbəri, “Alfa” bölməsinin keçmiş üzvü olduğu deyilən Denis Fisenkonu da qeyd edirlər.
Musavat.com
