Bakı, 5 mart, AZƏRTAC
İtaliya öz ərazisində ABŞ hərbi bazalarının istifadəsini tənzimləyən mövcud ikitərəfli müqavilələrə hörmət etməyə davam edəcək. AZƏRTAC xarici mediaya istinadla xəbər verir ki, bu fikri İtaliyanın Baş naziri Ciorcia Meloni cümə axşamı bildirib.
RTL-də radio proqramında çıxış edən Meloni vurğulayıb ki, İtaliya İrana qarşı hərbi əməliyyatlar üçün bazalardan istifadə ilə bağlı heç bir müraciət almayıb. “Demək istəyirəm ki, biz hərb vəziyyətində deyilik və müharibəyə girmək istəmirik”, - deyə o bildirib.
Meloni bildirib ki, İtaliya ABŞ ilə 1954-cü ildən bəri mövcud olan və müəyyən logistika, qeyri-döyüş əməliyyatları üçün bazalardan istifadəyə imkan verən uzunmüddətli ikitərəfli müqavilələrin şərtlərinə əməl edəcək. “Bunlar, açıq şəkildə logistika və qeyri-kinetik əməliyyatlar - sadəcə bombardmanla əlaqəli olmayan əməliyyatlarla bağlı texniki icazələrdir”, - deyə o bildirib. O əlavə edib ki, döyüş əməliyyatlarında iştirakla bağlı müraciət isə parlamentlə birlikdə müzakirə oluna bilər.
Baş nazir, həmçinin regionda eskalasiya riski barədə xəbərdarlıq edərək bildirib ki, münaqişə və İranın reaksiyasından narahatdır. O, vəziyyətin gözlənilməz nəticələrə səbəb ola biləcək eskalasiya riski yaratdığını və bunun İtaliyaya potensial təsirindən narahat olduğunu əlavə edib.
İtaliya, Böyük Britaniya, Fransa və Almaniya ilə birlikdə Körfəz bölgəsindəki ölkələrə müdafiə dəstəyi göndərməyi düşünür.
Meloni bildirib ki, bu addımın məqsədi ərazidə on minlərlə İtaliya vətəndaşını və orada yerləşən təxminən 2000 italyan əsgəri qorumaqdır. O, həmçinin Körfəzi enerji təchizatı üçün həyati əhəmiyyət kəsb edən bir ölkə kimi xarakterizə edib.
Baş nazir böhranın mümkün iqtisadi nəticələri barədə xəbərdarlıq edərək vurğulayıb ki, hökumət enerji və ərzaq qiymətlərinin artmasına səbəb olan möhtəkirliyin qarşısını almaq üçün tədbir görəcək. O, əlavə edib ki, hakimiyyət orqanları qaz qiymətlərini izləyir və vəziyyətdən sui-istifadə edən şirkətlər daha yüksək vergilərlə üzləşə bilər.
