SEPAH Komandanın müşaviri bildirib ki, qərar istisnasız olaraq bütün gəmilərə şamil olunur və İran boğazdan keçməyə çalışan istənilən su nəqliyyat vasitəsinə zərbə endirəcək...
Poliqon xəbər verir ki, İran İslam İnqilabı Keşikçiləri Korpusunun (SEPAH) komandanının müşaviri Hörmüz boğazının bağlandığını və İranın bu marşrutdan keçməyə cəhd edən hər bir gəmini hədəf alacağını açıqlayıb. O vurğulayıb ki, qəbul edilən qərar bütün gəmilərə, o cümlədən hərbi və mülki su nəqliyyat vasitələrinə şamil olunur və heç bir istisna nəzərdə tutulmur.
SEPAH rəsmisi qeyd edib ki, Hörmüz boğazı İranın milli təhlükəsizliyi ilə birbaşa bağlı strateji əhəmiyyət daşıyır və son hadisələr fonunda Tehran bu addımı atmağa məcbur qalıb. Onun sözlərinə görə, İran tərəfi bölgədə təhlükəsizliyə təhdid hesab etdiyi istənilən hərəkətə operativ və sərt cavab verəcək.
Hörmüz boğazı dünya enerji bazarı üçün həyati əhəmiyyətə malik su yoludur. Qlobal neft və mayeləşdirilmiş qaz tədarükünün mühüm hissəsi məhz bu dar dəniz keçidi vasitəsilə daşınır. Boğazın bağlanması beynəlxalq enerji bazarlarında ciddi dalğalanmalara, neft qiymətlərində artıma və logistika zəncirində pozuntulara səbəb ola bilər.
Beynəlxalq hüquqa görə, Hörmüz boğazı beynəlxalq su yolu hesab olunur və burada naviqasiya azadlığı prinsipi tətbiq edilir. İranın son bəyanatı isə regionda gərginliyin daha da artacağı ehtimalını gücləndirir. Hazırda digər ölkələrin və beynəlxalq təşkilatların məsələyə münasibəti diqqətlə izlənilir.
Poliqon.info
