Liqa 1-də ardıcıl üç məğlubiyyətdən sonra baş məşqçi Habib Beyeni istefaya göndərən “Renn” yeni çalışdırıcısını açıqlayıb.
QOL.az xəbər verir ki, "qırmızı-qaralar" komandanı Frank Ezə tapşırıb. 54 yaşlı mütəxəssis ilə 2027-ci ilin yayına qədər nəzərdə tutulan müqaviləyə imza atılıb.
Qeyd edək ki, təcrübəli mütəxəssis buna qədər Fransanın digər təmsilçiləri - "Lans" və "Nitsa"dakı fəaliyyəti ilə tanınır. Baş məşqçi ayrılığından sonra əvəzedici heyətin məşqçisinin rəhbərliyi altında meydana çıxan "Renn" son turda PSJ-ni 3:1 hesabı ilə məğlub edərək gözlənilməz qələbə qazanıb.
Hazırda Fransa çempionatının turnir cədvəlində 6-cı pillədə qərarlaşan "Renn" növbəti oyununu fevralın 22-də səfərdə "Oser"ə qarşı keçirəcək.
