Səudiyyə Ərəbistanı və ABŞ mərkəzli enerji şirkətləri Suriyanın şimal-şərqində neft və təbii qazın kəşfiyyatı, eləcə də enerji istehsalı fəaliyyəti həyata keçirmək üçün iri konsorsium yaratmağa hazırlaşır.
"Cebheinfo.az" xəbər verir ki, “Reuters”in xüsusi xəbərinə görə, məsələ barədə birbaşa məlumata malik mənbələr bildiriblər ki, Baker Hughes, Hunt Energy və Argent LNG şirkətləri bölgədə təxminən 4-5 kəşfiyyat blokunu əhatə edəcək layihə üçün Səudiyyə Ərəbistanının enerji nəhəngi TAQA ilə tərəfdaşlıq etməyi planlaşdırır.
Reuters daha əvvəl Səudiyyə şirkəti “Acwa”nın da layihəyə qoşulacağını bildirmişdi. Lakin məsələyə yaxın bir mənbə qeyd edib ki, “Acwa” nümayəndələri layihənin müzakirə olunduğu iclaslarda iştirak etsələr də, birbaşa tərəfdaşlıq planlaşdırmırlar.
“Acwa” tərəfindən verilən açıqlamada deyilir:
“Suriyada qısa müddət əvvəl elan etdiyimiz Birgə İnkişaf Sazişi yalnız suyun təmizlənməsi və su nəqli layihələrini əhatə edir”.
Suriyanın ənənəvi neft hasilatı mərkəzi hesab olunan şərq bölgəsi yaxın zamana qədər kürdlərin rəhbərlik etdiyi Demokratik Suriya Qüvvələrinin (SDQ) nəzarətində idi.
SDQ ötən ay hökumət qüvvələrinin irəliləyişindən sonra dövlət strukturlarına inteqrasiyanı nəzərdə tutan razılaşma imzalamışdı.
Şaraa hökumətinin əsas dəstəkçilərindən olan Səudiyyə Ərəbistanı ötən həftə sonu Suriyanın nəqliyyat, infrastruktur və telekommunikasiya sektorlarına milyardlarla dollar sərmayə yatıracağını açıqlamışdı.
Bundan əlavə, ötən həftə ABŞ-nin enerji nəhəngi “Chevron” Suriyanın sahil zolağında təbii qaz axtarışı aparmaq üçün Qətərin “UCC Holding” şirkəti ilə ilkin razılaşma imzalayıb.
