Azərbaycan investorları Türkiyə üzərindən Afrika və Yaxın Şərq bazarlarına, eləcə də Gömrük İttifaqı çərçivəsində Avropa İttifaqının 27 ölkəsinin bazarlarına daha rahat çıxış imkanına malikdirlər.
“APA-Economics” xəbər verir ki, bunu Bakıda keçirilən II Azərbaycan–Türkiyə İnvestisiya Forumunda çıxış edən Türkiyənin ticarət naziri Ömer Bolat bildirib.
Nazirin sözlərinə görə, Azərbaycan və Türkiyə arasında qarşılıqlı investisiyaların həcmi 39–40 milyard dollar səviyyəsinə çatıb. Hazırda Türkiyədə minlərlə Azərbaycan şirkəti, Azərbaycanda isə minlərlə Türkiyə şirkəti fəaliyyət göstərir ki, bu da iqtisadi münasibətlərin dərinliyini göstərir.
Ö. Bolat qeyd edib ki, investisiyaların artması ticarətin genişlənməsinə birbaşa təsir göstərir və forumun əsas məqsədi də qarşılıqlı yatırımların daha da artırılmasına şərait yaratmaqdır. O, Azərbaycanın iqtisadiyyatın şaxələndirilməsi istiqamətində, xüsusilə enerji sektorundan kənar sahələrdə atdığı addımların müsbət qiymətləndirildiyini bildirib.
Nazir vurğulayıb ki, Türkiyə iqtisadiyyatının miqyası və beynəlxalq bazarlara inteqrasiya səviyyəsi Azərbaycan iş adamları üçün yeni imkanlar açır və bu potensialdan daha geniş istifadə olunmalıdır.
