Macarıstanın Baş naziri Viktor Orban Avropa Birliyi sammitində Ukraynaya 90 milyard avro faizsiz kredit verilməsi qərarını sərt şəkildə tənqid edib. Vətəninfo.az xəbər verir ki, Orban bu qərarı “Avropanı müharibəyə yaxınlaşdıran pis addım” adlandırıb.
Jurnalistlərə açıqlamasında Orban bildirib ki, “Bu, kredit kimi görünür, amma ukraynalılar onu heç vaxt geri ödəyə bilməyəcəklər, yəni mahiyyət etibarilə bu, pul itkisi deməkdir”. O, həmçinin xəbərdarlıq edib ki, “bu kreditin arxasında duranlar məsuliyyət daşıyacaq və maliyyə nəticələrini ödəməli olacaqlar”.
Orban əlavə edib: “Təzminatları ödəmək üçün kredit vermək dərhal müharibəyə səbəb ola bilər. Düşünün: iki tərəf müharibədədir, siz isə üçüncü tərəf kimi içəri girib bir tərəfdən külli miqdarda pul verirsiniz. Bu nə deməkdir? Bu, müharibədir”.
Eyni zamanda, Avropa Şurasının prezidenti António Kosta Aİ sammitindən sonra keçirdiyi mətbuat konfransında bildirib ki, Avropa İttifaqı Ukraynaya öz büdcəsindən 90 milyard avro kredit ayırmaq qərarına gəlib. Kosta izah edib ki, kredit yalnız Ukrayna tərəfindən Rusiya təzminat ödədikdən sonra ödənilməlidir və AB bu krediti dondurulmuş Rusiya aktivlərindən istifadə etməklə geri qaytarmaq hüququnu saxlayır.
Bildirilib ki, bu qərara veto qoymaq hüququndan imtina edən Macarıstan, Slovakiya və Çexiya kreditin verilməsində iştirak etməyəcəklər.
