Almaniyada, doğum nisbəti, ömür uzunluğu və miqrasiya kimi demoqrafik amillərdə orta tendensiyalar nəzərə alınmaqla, əhalinin 2070-ci ildə 74,7 milyona düşəcəyi proqnozlaşdırılır.
Almaniya Federal Statistika İdarəsi (Destatis) 16-cı əlaqələndirilmiş əhali proqnozunu açıqladı. Bu proqnoza görə, 10 il ərzində ölkədə hər dörd nəfərdən biri 67 və ya daha yuxarı yaşda olacaq.

Təqaüd yaşına çatmış insanların sayı 2038-ci ilə qədər ən azı 3,8 milyon artaraq 20,5 milyona çatacaq.Hazırda 20 faiz olan təqaüdçülərin ümumi əhalidə payının 25-27 faiz arasında olacağı gözlənilir.

Bəyanata görə, əmək qabiliyyətli əhalinin azalmasının sosial təminat sistemləri üçün ciddi çətinliklər yaradacağı gözlənilir.

Destatis 2070-ci ildə proqnoz dövrünün sonunda əhalinin bu günkündən az olacağını proqnozlaşdırıb. Üç demoqrafik komponentdə - doğum nisbəti, ömür uzunluğu və xalis miqrasiya - orta artımı nəzərə alsaq, Almaniya əhalisi 2070-ci ildə 74,7 milyona düşəcək. 27 proqnoz ssenarisindən ikisi yüksək xalis miqrasiya və əhəmiyyətli dərəcədə artan doğum nisbətinə əsaslanaraq əhalinin cüzi artımını proqnozlaşdırıb. Ümumilikdə, 2070-ci il üçün proqnozlaşdırılan əhali sayı 63,9 milyondan 86,5 milyona qədər dəyişir.

Destatisin 2022-ci il üçün 15-ci əhali proqnozunda, ssenaridən asılı olaraq 2070-ci il üçün əhali sayı 70,2 milyondan 94,4 milyona qədər dəyişirdi.

Bəyanatda deyilir ki, "İkinci Dünya Müharibəsinin bitməsindən sonrakı illərdə əhalinin çox sürətli artımı dövründə doğulanların təqaüdə çıxması və gənc nəsillərin gəlişi ilə əmək qabiliyyətli (20-66 yaş) əhali 2030-cu illərin ortalarından etibarən azalacaq. Bu fərq proqnozlaşdırılan xalis miqrasiya qazancları ilə aradan qaldırıla bilməz."

Destatis-in Əhali Bölməsinin rəhbəri Karsten Lummer mətbuata bildirib ki, "Hazırda əmək qabiliyyətli hər 100 nəfərə pensiya yaşında 33 nəfər düşür."

Lummer bildirib ki, ən yaxşı ssenaridə bu rəqəm 2070-ci ilə qədər 43-ə çatacaq, ən pis ssenaridə isə davamlı olaraq aşağı doğum nisbətləri və kiçik xalis miqrasiya ilə 61-ə çata bilər.

Lummer əlavə edib: "Bu, mövcud rəqəmin demək olar ki, ikiqat artması deməkdir. O zaman pensiya sistemindən müavinət alan hər bir şəxs üçün iki nəfərdən az ianəçi olacaq."

Almaniyanın əhalisi 83,6 milyondur.
Digər tərəfdən, xaricdən gələn immiqrasiyanın təsiri ilə Almaniya əhalisi 2024-cü ildə 121.000 (0,1 faiz) artaraq 83,6 milyona çatıb. Lakin, 2023-cü ildə 660.000 olan xalis miqrasiya ötən il 420.000-ə düşüb.

Əvvəlki illərdə olduğu kimi, ötən il doğulanlardan daha çox insan ölüb, doğum sayını aşan ölümlərin sayı 330.000-ə yüksəlib.

2024-cü il etibarilə Almaniyada 25,5 milyon insanın 60 yaş və yuxarı olduğu müəyyən edilib. Bu, ümumi əhalinin 30,5 faizinə bərabərdir.

aia.az
Tərcümə şöbəsi