Çin Xalq Bankı (ÇXB) noyabrda qızıl ehtiyatlarını ardıcıl 13-cü ay artıraraq beynəlxalq bazarlarda diqqət çəkib. Rəsmi məlumatlara görə, ölkənin qızıl ehtiyatları əvvəlki aydakı 74,09 milyon unsiyadan noyabrda 74,12 milyon unsiyaya yüksəlib.
Hafta.az yazır ki, bu artımla Çinin ümumi qızıl ehtiyatlarının pul dəyəri 297,2 milyard dollardan 310,7 milyard dollara çatıb.
Qızıl ehtiyatlarındakı bu artımla yanaşı, Çinin valyuta ehtiyatları da eyni dövrdə cüzi artım göstərərək 3,343 trilyon dollardan 3,346 trilyon dollara yüksəlib.
Mütəxəssislər ÇXB-nin müntəzəm qızıl alışlarının qlobal qızıl qiymətlərinin artmasında əhəmiyyətli rol oynadığını bildirirlər.
Dünya Qızıl Şurasının məlumatlarına görə, mərkəzi banklar oktyabr ayında ilin ən yüksək aylıq tələbatını qeydə alıblar və xalis qızıl alışları 53 ton olub. Bu həcm əvvəlki aya nisbətən 36 faiz artım deməkdir.
Yanvar-oktyabr ayları arasında ümumi qızıl alışı 254 tona çatsa da, artım son üç illə müqayisədə daha mülayim olub. Oktyabrda güclü qızıl tələbatı əsasən inkişaf etməkdə olan ölkələrin mərkəzi bankları tərəfindən idarə olunub.
