"Turan Tovuz" klubunda baş məşqçi Kurban Berdıyevin köməkçisi kimi çalışan, Azərbaycan futbolunun əfsanəsi Yunis Hüseynovun Offsideplus.az saytına müsahibəsi:

- Kurban Berdıyevlə işləmək necədir?

- Berdıyevlə çalışmaq gözəldir. Həddindən artıq məsuliyyətli bir işdir. Hər bir məşqçi istəyərki, Kurban Berdıyev kimi bir məşqçinin yanında nələrsə öyrənsin. Bu da mənim bəxtimdəndir ki, onun kimi bir mütəxəssisin yanında çalışıram. Ondan çox şey öyrənmişik, öyrənməyə də davam edirik. İnandırım sizi ki, hələ də onun yanına təcrübəyə gələn məşqçilər var. Berdıyevin yanında işləmək şərəfdir.

- Yəqinki, sizi yanına çağıran Berdıyev olmasa idi, başqa baş məşqçinin yanında çalışmazdınız?

- Heç vaxt qəbul etməzdim. Bilirsiniz ki, mən özüm də baş məşqçilik etmişəm. Düzdü, mən birbaşa baş məşqçiliyə başlamışdım. Çox gənc idim. Köməkçi məşqçi olub sonra baş məşqçiliyə keçmək daha yaxşı olardı. Ancaq məndə elə alındı ki, 2004-cü ildə baş məşqçi oldum. Həmin vaxtlarda təcrübəsiz idim. Ancaq daha sonra oxuyaraq bir-bir kateqoriyaları da aldım. Bəli, düz deyirsiniz ki, başqa biri olsa idi, onun yanına köməkçi kimi getməzdim. K. Berdıyev həddindən artıq savadlı mütəxəssisdir. Ondan öyrənməli çox şeylər var. Həm də mən onu 2012-ci ildən bəri tanıyırdım. Onunla işləmək xoşdur.

- Tanışlıq harda yaranmışdı?

- O zaman "Xəzər-Lənkəran"ı çalışdırırdım. Kurban Berdıyev də onda "Rubin"in baş məşqçisi idi. Avstriyada təlim-məşq toplanışında idik. Tanışlıq da o vaxt yaranmışdı.

- Sizin "Karvan"ınız yaxşı komanda idi. "Xəzər Lənkəran"dakı ilk dönəminiz də pis deyildi...

- Məşqçi karyeram uğursuz olmayıb. Bilirsiniz ki, çempionatda maliyyə cəhətdən yaxşı olmasan, komandanı saxlamaq çətin məsələdi. Bir az deyim sizə ki, uğurlu olmayan yerlərdə də maliyyə cəhətdən problemlər yaşanıb. "Karvan" o vaxt çempionluğa oynayırdı. Avropa Liqasında (o vaxtkı UEFA Kuboku) mərhələni keçən ilk Azərbaycan klubu da biz olmuşuq. 

- "Turan Tovuz" bu mövsüm daha stabil görünür. Ötən mövsümdə əslində minimal vəzifəni yerinə yetirmişdiniz - 4-cü olmuşdunuz. Lakin "Sabah"ın kuboku qazanmağı planları pozdu. Cari mövsüm yaydakı transferlərlə daha iddialı görünürsünüz...

- Belə deyək, komandamızın baş məşqçi Kurban Berdıyev hər cəhətdən futbolçulara rəqibləri izah edir. Bu mövsümkü hədəfimiz yaxşı yerlərdən birini tutub, avrokuboklara vəsiqə qazanmaqdır. Bunu qarşımıza məqsəd kimi qoymuşuq. Düşünürəm ki, komandamız da bunu uyğun oynayır. Futbolçularımız da motivasiyalıdır. Düzdür, keçən mövsümlə müqayisədə daha stabilik, daha yaxşı nəticələr əldə edirik. Bunun da səbəbkarı K. Berdıyevdir. Onun oynatdığı oyuna uyğun futbolçular seçilib, transfer edilib. Futbolçular da onun dediyini yerinə yetirir. Mövsümün sonuna qədər belə çıxış etsək, yaxşı yerlərdən birini tutacağıq.

- Düşünmürsüz ki, Berdıyev kimi məşqçilər artıq futbolda azalıb. Onun kimi hər şeyi kontrol etməyi sevən, oyunu əlində saxlamaq istəyən mütəxəssislər artıq çox yoxdur. Onu bir az "old school" adlandıra bilərikmi?

- Kurban Berdıyev belə məşqçi deyil. Mən düşünmürəm ki, o belədir. O, futbolçularda meydanda yetərli azadlığı verir. Berdıyev onun tərəfdarıdır ki, futbolçu meydanda nəyi yaxşı edə bilirsə, onu da etsin. Futbolçular həddindən artıq sərbəstlik verir. Ancaq taktiki intizam pozulmamaq şərti ilə.

- Bəzən insanlar "Turan Tovuz"un oyununu darıxdırıcı adlanır. Siz necə düşünürsünüz: darıxdırıcı oyunla gələn 3 xal, yoxsa baxımlı oyunla xal itkisi?

- Mənə elə gəlir ki, 3 xal olsa, daha yaxşıdır. Heç vaxt soruşmurlar ki, yaxşı oynamısanmı. Hamı nəticə ilə maraqlanır. Bizim elə oyunumuz olub ki, həddindən artıq yaxşı oynamışıq, ancaq qələbə qazana bilməmişik. Amma komanda 3 xal qazanıbsa, deməli yaxşı oynayıb. Elə bir şey yoxdur ki, sən zəif oynayasan, amma sonda 3 xal qazanasan. Müdafiədə də oynaya bilərsən, əks-hücumda da. Biz oyundan əvvəl rəqiblərimizi analiz edərik. Ona uyğunda oynamağa çalışırıq. Sonda onları məğlub etmişiksə, deməli onların zəif nöqtələrini tapa bilmişik. Mən belə düşünürəm.

- Yaydakı transferiniz də uğurlu alındı. Enrike Silva, Roberto Olabe, Filip Ozobiç, İbrahima Vadji, Aleks Serrano yenidən qayıtdı. Olabe maraqlı oyunçudur...

- Bu yayki bütün transferlərimiz komandaya güc qatdılar. Adaptasiya prosesini tez keçdilər. 2-ci yerdə gediriksə, deməli düzgün adamları gətirmişik.

- "Zirə" ilə oyunda Rəşad Sadıqovla aranızda qısa bir mübahisə yaranmışdı. Orada nə baş verdi?

- Mənim heç kimlə mübahisəm olmur. O cümlədən də Rəşad Sadıqovla. Elə bir mübahisəmiz də olmadı. Bu futboldur. Rəşad Sadıqov da əsəbləşir, mən də əsəbləşirəm. O oyunda "Zirə"nin qırmızı vərəqəsi ləğv olunmuşdu. Sonradan da bilindi ki, bu yanlış qərardı. Bu qərarı verən Əliyar Ağayev və İnqilab Məmmədova da artıq bir neçə turdur ki, oyun verilmir. Onlar da səhvlərini başa düşdülər. Deməli, burada düz biz idik.

- Hakimlər Komitəsində də dəyişiklik oldu. Frank De Blekere getdi, Rəhim Həsənov gəldi...

- Rəhim Həsənova uğurlar arzu edirəm. Yerli mütəxəssisimizdi. Yəqinki dəyişikliklər olar. Bəzi hakimlər var ki, öz üzərlərində işləsələr, daha yaxşı olar. Onların işlərinə qarışmaq istəmirəm. Bəzi oyunlarda verilən qərarlara çox əsəbləşirəm. Biz də neçə ildir futbolun içindəyik. Ona görə də öz üzərlərində işləsələr, hər şey daha yaxşı olar.

- Bəxtiyar Musayev bir müsahibəsində demişdi ki, o vaxt "Neftçi"də 2 topumuz var idi: biri ilə bütün komanda məşq edirdi, biri ilə Yunis Hüseynov.

- Bəxtiyarın həmişə belə maraqlı fikirləri olur. Mən ona təşəkkür edirəm. O, həmişə müsahibələrində deyir ki, Yunisdən çox şey "oğurlamışam". Futbol oynadığımız vaxtlardan gedir söhbət. O vaxtlar mən təcrübəli idim, o gənc idi. Sağolsun, həmişə haqqımda xoş sözlər deyir.

- Bəs siz özünüzü futbolçu kimi necə xarakterizə edərdiniz?

- Pis futbolçu olmamışam. Daha yaxşı ola bilərdim. Biz indi futbolçularımıza başa salırıq ki, legioner həyatı yaşamaq lazımdır. Əgər sən bu işdəsənsə, ömrünü-gününü futbola verməlisən. Ortada qalmamalısan. O vaxtları da biz gənc idik, bizə deyən olmadı ki, get xaricdə oyna. Əksinə deyirdilər, burda qal. Bizə də yol göstərən olsaydı, gedib Avropada oynayardıq. Buna gücüm də var idi. SSRİ-nin Olimpiya yığmasında da oynamışam. Çox komandalar da istəyib məni, getməmişəm, elə qalmışam burda. Səhvlər etmişəm, gərək vaxtına gedərdim. Pis futbolçu deyildim, amma daha yaxşısını edə bilərdim.

- Ötənlərdə Amil Yunanovla söhbətləşirdim. O dedi ki, "bəzən elə klublardan təklif gəlir ki, gedib görürük şəraitləri çox pisdi. Burda qalsaq, ondan yaxşıdı". Siz necə düşünürsünüz, buna rəğmən yenə də getmək lazımdı?

- Əlbəttə ki getmək. Bilirsiniz necədir, hazırda legioner limitini də ləğv ediblər. Mən düşünürəm ki, bu qərar səhvdir. Bu, həm milli komandamıza ziyandır, həm də yerli futbolçular kənarda qalır. Ona görə də futbolçularımız çalışmalıdır ki, hansısa bir ölkəyə gedib legioner həyatı yaşasın. Sonra da çalışıb daha yaxşı yerə getmək lazımdır. Mən düşünürəm ki, şans düşürsə, mütləq xaricə transfer olmaq lazımdır.