“Apple Computer” (indiki “Apple Inc.”) şirkətinin təsis olunması ilə bağlı sənəd hərraca çıxarılıb.
Yeniavaz.com “9to5Mac” portalına istinadla xəbər verir ki, sənədə 2 milyon dollardan 4 milyon dollara qədər təkliflərin gələcəyi gözlənilir.
Əgər sənəd gözlənilən qiymətə satılarsa, bu, “Apple”la bağlı indiyə qədər satılan ən bahalı lot olacaq.
Satış “Christie's” hərrac evində baş tutacaq.
Hərrac evi bu sənədi hələ öz saytında yerləşdirməyib. Lakin KİV-in məlumatına görə, o, 2026-cı il yanvarın 23-də hərraca çıxarılacaq.
Sənəd Stiv Cobs, Stiv Voznyak və Ron Ueyn tərəfindən imzalanmış 1976-cı ilin üç səhifəlik tərəfdaşlıq müqaviləsidir.
Sənəddə ilkin paylar müvafiq olaraq 45%, 45% və 10% müəyyən edilib. Lakin Ueyn bir neçə gün sonra payını 800 dollara satıb.
“Christie's” şirkətin təsis müqaviləsini və Ueynin ayrılma müqaviləsini tək lot olaraq hərraca çıxaracaq.