Bakı, 27 noyabr, AZƏRTAC
Hər sahədə olduğu kimi, kommunikasiya və media istiqamətində də texnologiya çox sürətlə inkişaf edir. Ən yeni texnologiyalar dünyada sürətlə yayılır.
Bu sözləri AZƏRTAC-a açıqlamasında Şimali Kipr Türk Cümhuriyyətinin xarici işlər nazirinin müavini Mustafa Lakadamyalı deyib.
O bildirib ki, Bakıda keçirilən Türk Dövlətləri Təşkilatının Media Forumunda həm bu texnologiyalara uyğunlaşmaq, həm də onun sayəsində yayılan yanlış məlumatlara, yalan xəbərlərə, dezinformasiyaya qarşı Türk dünyasının necə mübarizə apara biləcəyi mövzuları müzakirə edilir.
Forumun çox faydalı olduğunu deyən nazir müavini əlavə edib: “Azərbaycan bu sahənin əhəmiyyətinin fərqində olduğu üçün belə bir forum təşkil edərək bütün Türk dövlətlərini bu istiqamətdə əməkdaşlığa təşviq edir. Bu məsələdə həm Azərbaycana, həm də Türkiyəyə təşəkkür edirik”.
