Bizimyol saytından əldə olunan məlumata görə, ain.az məlumat yayır.
“ABŞ səfirinin Bakıya təyinatının gecikməsi daxili siyasi prosedurlarla, həmçinin ABŞ Konqresinin qərar qəbul etməsinə ermənipərəst siyasətçilərin təsiri ilə əlaqələndirilə bilər. Məsələn, daha öncəki səfirin təyinatı da xeyli müddət çəkmişdi. Belə ki, Mark Libbinin səfir təyinatı 2022-ci ilin mayında təklif olaraq irəli sürülsə də onun vəzifəsində təsdiqlənərək ölkəmizə gəlməsi 2023-cü ilin dekabrına təsadüf etmişdi. Yəni, proses 1 il yarım vaxt aparmışdı. Ondan öncə, 2018-ci ildən ölkəmizdə səfir olan Li Litsenberqer isə postunu 2022-ci ilin yayında tərk etmişdi. Bütün bunlar Azərbaycanın Vətən müharibəsində şanlı qələbəsi fonunda ABŞ-dan və ümumilikdə Qərb blokundan ölkəmizə təzyiqlərin artması fonunda yaşanan gərginliklərlə paralel baş verdiyinə görə, biz müvafiq bağlılıq axtarırıq”.
Bu barədə Bizimyol.info xəbər portalına danışan Sosial Tədqiqatlar Mərkəzinin (STM) baş məsləhətçisi Şəhla Cəlilzadə bildirib ki, həmin dövrdə ABŞ Konqresində ölkəmiz əleyhinə ciddi təzyiqlər var idi: “Həmin dövrdə Trampa yaxınlığı ilə bilinən "Fox" telekanalında da ölkəmiz əleyhinə reportajlar getmişdi. Qlobal erməni şəbəkəsi “ikinci erməni soyqırımı” narrativini yaymağa çalışır və ABŞ-da bu saxta narrativ müvafiq dəstək görürdü. ABŞ Konqresinin Nümayəndələr Palatasının üzvləri Frank Pallone, Gus M. Bilirakis, Jackie Speier, David G. Valadao, Adam B. Schiff (Armenian Caucus/Erməni İşi həmsədrləri) başda olmaqla ölkəmiz əleyhinə sərt çağırışlar edilir və əks-təbliğat aparılırdı. Hətta ABŞ-ın Bakıdakı səfirliyinin 2022-ci ildə Laçın dəhlizinin açılmasına çağırışını xatırlamaq olar. Lakin, bütün bunlar arxada qaldı”.
Şəhla Cəlilzadə
Şəhla Cəlilzadə vurğulayıb ki, Azərbaycan öz haqlı və beynəlxalq hüquqla təsdiqlənən mövqeyini dünya ictimaiyyətinə, o cümlədən ABŞ-a çatdırmağa qadir oldu: “Elə buna görə də Mark Libbi 2024-cü ilin mayında Şuşaya gedərək işğaldan azad edilmiş torpaqlarımıza səfər edən ilk ABŞ səfiri kimi tarixə düşdü. Halbuki səfərdən az öncə belə bir səfəri “şou” adlandırmış, cənab Prezident isə bu ifadəyə cavab olaraq, sitat “Bizim onlara ehtiyacımız yoxdur. İstəyirlər gələrlər, istəmirlər gəlməzlər. Onların buraya gəlməsi heç nəyi dəyişmir” demişdi. Libbinin müvafiq ifadə səsləndirməsi aid olduğu Bayden-Blinken Administrasiyasının həmin dövrdə Ermənistanla dərinləşən strateji münasibətləri və antiAzərbaycan sentimenti ilə bağlı idi. Lakin bu fonda onun Şuşaya səfər etməsi də erməni lobbisindən ciddi təzyiqlərlə üzləşməsinə səbəb olmuşdu”.
Politoloqun fikrincə, bəlkə də səfir erməni revanşist qüvvələrinin “xərçəngi”nə yoluxduğu üçün Şuşa səfərindən cəmi yarım il sonra ölkəmizi tərk etməyə məcbur qalmışdı: “Hazırda Azərbaycan və ABŞ arasında münasibətlər yüksələn xətt üzrə inkişaf etməkdədir. Burada Donald Trampın Prezident seçilməsi və hazırkı ABŞ Administrasiyanın Cənubi Qafqaza dair yeni geosiyasi reallıqlara uyğunlaşdırılmış balanslı siyasəti, xüsusilə ABŞ Prezidentinin cənab Prezident İlham Əliyevə yüksək ehtiramı mühüm rol oynayır. 8 avqust 2025-ci il tarixində Azərbaycan, ABŞ və Ermənistan dövlət başçılarının imza atdığı üçtərəfli bəyannamə, Azərbaycan-ABŞ ikitərəfli münasibətlərini yeni inkişaf səviyyəsinə qaldıracaq “Strateji Tərəfdaşlıq Xartiyası”nın hazırlanmasına dair İşçi Qrupun yaradılması və bu istiqamətdə müvafiq hazırlıq işlərinin görülməsi, qarşılıqlı səfərlər, ABŞ iqtisadi-ticarət nümayəndələrinin regional səfər çərçivəsində ölkəmizdə olmaları və s. məqamlar qarşıdakı dövrdə münasibətlərin daha da dərinləşəcəyini göstərir”.
İradə Cəlil, Bizimyol.info
Hadisənin gedişatını izləmək üçün ain.az saytında ən son yeniliklərə baxın.
