Gürcüstanın keçmiş Baş naziri Giorgi Qaxariya ona qarşı açılmış cinayət işinə münasibət bildirib.
Moderator.az xəbər verir ki, o, “X” hesabında irəli sürülmüş ittihamların uydurma olduğunu yazıb.
Qaxariya “Gürcü Arzusu”nu siyasi təqibdə ittiham edib.
“Bizim siyasi partiyamız və şəxsən mənim üçün bu, Gürcüstanın Avropa gələcəyinin qorunub saxlanılması uğrunda mübarizədə yeni mərhələdir. Bu mübarizə bütün mümkün platformalardan istifadəni tələb edir”, - sabiq Baş nazir qeyd edib.
Qeyd edək ki, Gürcüstan Baş Prokurorluğu Qaxariya barəsində cinayət işi açıb. İş 2019-cu ilin 20-21 iyun hadisələri və işğal xətti yaxınlığında yerləşən Çorçana kəndində polis postunun yaradılması ilə əlaqəlidir. İttihamlara əsasən keçmiş hökumət başçısı 13 ilədək həbs müddəti ilə üzləşə bilər.
Xatırladaq ki, Qaxariya 2017-2019-cu illərdə Gürcüstanın daxili işlər naziri, 2019-2021-ci illərdə isə Baş naziri olub. O, bu ilin iyununda Gürcüstanı tərk edib, hazırda Almaniyada uzunmüddətli viza əsasında yaşayır. Beynəlxalq qanunvericiliyə əsasən, o, Gürcüstana təhvil verilə bilməz və yalnız Gürcüstana döndüyü zaman həbs oluna bilər.
