Enerji sektorunda 100 milyon dollarlıq çirkli vəsaitlərin yuyulması ilə bağlı araşdırma hökumətdə sarsıntı yaradıb...
Poliqon xəbər verir ki, Ukrayna hökuməti ölkənin ədliyyə naziri German Qaluşenkonu vəzifəsindən müvəqqəti uzaqlaşdırıb. Baş nazir Yuliya Sviridenko bu barədə X sosial şəbəkəsində açıqlama verərək bildirib ki, qərar “enerji sektorunda irimiqyaslı korrupsiya sxemi ilə bağlı istintaq” çərçivəsində qəbul olunub.
Bloomberg-in məlumatına görə, Ukraynanın Antikorrupsiya Bürosu (NABU) və Xüsusiləşdirilmiş Antikorrupsiya Prokurorluğu (SAP) enerji sahəsində “çirkli pulların yuyulması” ilə bağlı genişmiqyaslı araşdırmaya başlayıb. İstintaqın ilk mərhələsində beş nəfər saxlanılıb. Onların 100 milyon dollardan çox vəsaiti Kiyevdəki ofislərdən biri vasitəsilə leqallaşdırdıqları iddia olunur.
Ukrainska Pravda nəşri hüquq-mühafizə orqanlarındakı mənbələrə istinadən yazır ki, NABU əməkdaşları Qaluşenko ilə əlaqəli obyektlərdə axtarışlar aparıblar. O, iyul ayına qədər energetika naziri vəzifəsində çalışıb və istintaqçılar məhz bu dövrü korrupsiya sxeminin formalaşması üçün əsas mərhələ kimi qiymətləndirirlər.
Daha sonra NABU və SAP Telegram üzərindən istintaqla bağlı yeni detallar açıqlayıb. Məlumata görə, bu sxemdə keçmiş vitse-premyer də iştirak edib. O, istintaq materiallarında “Çe Gevara” ləqəbi ilə qeyd olunur. Prokurorluq həmin şəxsə qanunsuz varlanma maddəsi üzrə rəsmi ittiham irəli sürüb və onun hesabına 1,2 milyon dollar, həmçinin 100 min avro məbləğində vəsait köçürüldüyünü təsdiqləyib.
Bloomberg yazır ki, bu istintaq son illərin Ukraynada enerji sektorunu əhatə edən ən böyük korrupsiya işlərindən biridir. Mütəxəssislər bildirirlər ki, bu sahə ənənəvi olaraq iri maliyyə axınlarının və yüksək korrupsiya risklərinin cəmləşdiyi bir sahə hesab olunur.
German Qaluşenkonun vəzifədən uzaqlaşdırılması qərarı Qərb tərəfdaşlarının artan təzyiqi fonunda hökumətin korrupsiyaya qarşı mübarizədə qətiyyət nümayiş etdirməyə çalışması kimi qiymətləndirilir. Beynəlxalq donorlar xüsusilə büdcə və xarici yardım vəsaitlərinin şəffaf xərclənməsini tələb edirlər.
Ekspertlər hesab edirlər ki, davam edən istintaq Ukrayna hökumətinin reputasiyasına ciddi təsir göstərə və beynəlxalq maliyyə dəstəyinin gələcək taleyini müəyyən edə bilər.
Poliqon.info
