8 Noyabr Azərbaycan tarixinin ən şərəfli səhifələrindən biridir. Bu gün xalqımızın azadlıq iradəsini, ordumuzun qüdrətini və dövlətimizin qətiyyətini bir daha bütün dünyaya nümayiş etdirən Zəfər Paradı keçirildi.
2020-ci ildə 44 günlük Vətən müharibəsində əldə edilən tarixi qələbədən beş il ötür. Beş il sonra Azərbaycan, Zəfərin beşinci ildönümünü sadəcə xatırlamadı onu yaşatdı, göstərdi və dünyaya təqdim etdi.
Birlik və həmrəylik mesajı
Bu ilki Zəfər Paradının ən yaddaqalan məqamlarından biri də Türkiyə və Pakistan dövlət rəhbərlərinin Bakıda, Azadlıq meydanında Azərbaycanın yanında yer alması idi.
Tribunada dalğalanan Azərbaycan, Türkiyə və Pakistan bayraqları təkcə dostluğun deyil, ümumi tarix, ortaq inanc və bölünməz qardaşlıq ruhunun rəmzinə çevrildi.
Türkiyə Prezidenti və Pakistanın yüksək səviyyəli nümayəndə heyəti ilə yanaşı dayanan Azərbaycan Prezidenti İlham Əliyev, bir daha dünyaya göstərdi ki, bu qardaş xalqları təkcə diplomatik münasibətlər deyil, qan, iman və Zəfər birləşdirir.
O an Azadlıq meydanında üç dövlətin bayraqları eyni küləklə dalğalanır, bir səs, bir nəfəs kimi “Zəfər bizimdir!” deyirdi. Bu mənzərə təkcə bir parad deyil, ümumtürk həmrəyliyinin canlı simvolu idi.
Müasir silah, Müasir ordu
Parad zamanı nümayiş olunan hərbi texnika bir daha sübut etdi ki, Azərbaycan Ordusu regionda ən müasir və çevik silahlı qüvvələrdən biridir. Meydandan keçən zirehli texnikalar, pilotsuz uçuş aparatları, artilleriya sistemləri və modern hava hücumundan müdafiə vasitələri təkcə güc nümayişi deyil, həm də ölkəmizin müdafiə sənayesində əldə etdiyi irəliləyişlərin canlı göstəricisidir.
Zəfər paradında yer alan Bayraktar TB2, Harop, İti Qovan və digər dronlar Azərbaycanın müharibə dövründə yaratdığı yeni taktiki üstünlüyü xatırlatdı. Bununla yanaşı, modernləşdirilmiş T-90 tankları, LORA raket sistemləri, Polonez və Kasırğa tipli uzaqmənzilli atəş vasitələri də meydanda güc nümayiş etdirdi.
Bu texnikalar yalnız silah deyil onlar Azərbaycanın müstəqil hərbi siyasətinin, yəni öz gücünə arxalanmaq prinsipinin təcəssümüdür.
Görünməz qüvvənin görünən zəfəri
2020-ci ildə 44 günlük Vətən müharibəsi başlayanda Azərbaycan Ordusunda təxminən 2000 nəfər Xüsusi Təyinatlı Qüvvə (XTQ) var idi. Bu gün isə yalnız parad meydanında 4000 yüksək təlimli XTQ iştirak etdi.
Bu, cəmi beş il ərzində iki dəfədən çox artım deməkdir və bu da yalnız qüvvələrin bir hissəsidir.
XTQ-lərin sıralarından keçən hər bir əsgərin addımı Zəfərin ruhunu və şəhidlərin xatirəsini daşıyırdı. Onların qətiyyətli baxışları, nizamlı addımları və peşəkar hazırlığı Azərbaycan Ordusunun müasir və dönməz gücünü əks etdirirdi. Bu qüvvələr həm texniki, həm taktiki, həm də mənəvi baxımdan Azərbaycanın hərbi qüdrətinin onurğa sütunu sayılır.
Prezident İlham Əliyevin paradda söylədiyi kimi:
“Ordumuz bütün regionda sülhün və təhlükəsizliyin zəmanətidir. Azərbaycana qarşı işğal törətməyə heç bir dövlətin cəhd etməsinə imkan verilməyəcək".
Bu sözlər sadəcə bəyanat deyil, gücün diplomatiyaya çevrilmiş ifadəsidir. Azərbaycan bu gün regionda sabitliyin, ədalətin və sülhün təminatçısıdır. Güclü ordu yalnız müharibə üçün deyil, sülhün qorunması üçün də vacibdir.
44 günlük müharibədən sonra beş il ərzində ölkəmiz təkcə sərhədlərini deyil, bütün regionun təhlükəsizliyini qoruyan qüvvəyə çevrilib.
Güclü dövlət – güclü ordu
Azərbaycan artıq təkcə iqtisadi və diplomatik sahədə deyil, həm də hərbi baxımdan dünyanın ən güclü ordularından biri kimi tanınır.
Müasir silah sistemləri, milli istehsal gücü, yüksək hazırlıqlı şəxsi heyət və strateji müttəfiqlik siyasəti ölkəmizin müdafiə gücünü daha da artırır.
Zəfər Paradı bir daha göstərdi ki, bu gün Azərbaycan yalnız öz sərhədlərinin deyil, həm də regional sülhün keşiyində duran qüdrətli dövlətdir.
Qardaş ölkələrin liderlərinin Bakı səmasında dalğalanan bayraqları isə bu gücün tək bir dövlətin deyil, bütün Türk-İslam dünyasının qələbəsi olduğunu dünyaya nümayiş etdirdi.
Yusif Quliyev
