ABŞ Prezidenti Donald Trampın xüsusi nümayəndəsi Stiv Uitkoff Azərbaycan Prezidenti İlham Əliyevin Ermənistanla 30 ildən çox davam edən münaqişənin nizamlanması zamanı mövqeyini və hərəkətlərini yüksək qiymətləndirib.
Oxu.Az xəbər verir ki, Uitkoff bu barədə “Fox News” telekanalında aparıcı Bret Bayerə müsahibəsində deyib.
Amerikalı siyasətçi qeyd edib ki, Donald Tramp Oval Kabinetdəki görüşdə İlham Əliyevdən hərbi üstünlüyünə baxmayaraq, niyə hücumu dayandırdığını soruşub. Azərbaycan lideri isə bu suala cavabında məqsədinin yalnız işğal altında olan ərazilərin azad edilməsi olduğunu və daha çoxuna can atmadığını bildirib.
Uitkoff vurğulayıb ki, belə bir qərar kamillik və əsl dövlət təfəkkürünün nümunəsidir. Onun sözlərinə görə, İlham Əliyev ədalətli hədəfə çatdıqdan sonra dayanmağa üstünlük verib.
Trampın xüsusi nümayəndəsi əlavə edib ki, Azərbaycan Prezidentinin davranışı məsuliyyətli rəhbərliyin nümunəsidir və uzunmüddətli münaqişələrə cəlb olunmuş digər dünya liderləri üçün örnək ola bilər.
