Adətən kif sağlamlıq üçün zərərli sayılır və kiflənmiş qidaların atılması tövsiyə olunur. Lakin bəzi istisnalar var.
Pravda.az bildirir ki, müəyyən növ pendirlər və bərk meyvə-tərəvəzlər kiflənsə belə, təhlükəsiz şəkildə yeyilə bilər.
Kif — nəmli və isti şəraitdə yaranan mikroskopik göbələklərdir. Onlar qidaların səthində rəng dəyişimi və yumşaqlıq əmələ gətirir. Amma bəzi hallarda kif yalnız səthi zədələyir, məhsulun iç hissəsinə keçmir.
Məsələn, Parmigiano-Reggiano, Pecorino və Cheddar kimi bərk pendirlərin kiflənmiş hissəsi ən azı 2,5 sm dərinlikdə kəsilərək qalan hissəsi rahatlıqla yeyilə bilər. Roquefort və Gorgonzola kimi pendirlərdə isə kif istehsal prosesinin bir hissəsidir, ona görə bu pendirlər təhlükəsiz hesab olunur.
Kök, kələm, alma və bibər kimi sərt tərəvəz və meyvələrdə də kif yalnız səthdə qalır. Kifli hissə kəsildikdən sonra məhsulun qalan hissəsi istifadə oluna bilər. Eləcə də, kolbasa və qurudulmuş ət məhsullarında səthdə yaranan kif silinərək aradan qaldırıla bilər.
Bununla belə, mütəxəssislər bildirir ki, əgər kif məhsulun dərin hissəsinə keçibsə və xoşagəlməz qoxu varsa, həmin qidanı yemək sağlamlıq üçün risklidir.
Əminə Bayramova
